“Ekol Mühəndislik Xidmətləri” QSC fəaliyyətə başladığı ildən istehsalat sahələrinin modernləşdirilməsinə və maddi texniki bazasının müasir qurğu və avadanlıqlarla təchiz olunmasına böyük önəm verir. Bu məqsədlə dünyanın analoji şirkətləri ilə vaxtaşırı görüşlər keçirilir və əməkdaşlıq əlaqələri genişləndirilir. Hazırda QSC-nin texniki parkında neftşlamın emalı və zərərsizləşdirilməsi, eləcə də çirkab suların təmizlənməsi sahəsində Almaniyanın, İsveçrənin, Hollandiya və İtaliyanın tanınmış şirkətlərinin istehsalı olan ən müasir qurğularından istifadə edilərək yüksək nəticələr əldə olunur.
Bununla belə, ARDNŞ-nin fəaliyyət sahələrində neftlə çirklənmiş torpaqların təmizlənməsinin aktuallığını nəzərə alan və bu layihələrin həyata keçirilməsində bilavasitə iştirak edən, QSC-nin rəhbərliyi, daimi yeni texnika və texnologiyaların axtarışındadır. Elə bu məqsədlə də, iyun ayında QSC-nin rəhbərliyi İtaliyanın Luqo şəhərində fəaliyyət göstərən “Diemme S.P.A.” şirkətində olmuş və bu şirkətin rəhbərliyi ilə bir sıra işgüzar görüşlər keçirmişlər. QSC-nin rəhbərliyi “Diemme S.P.A.” şirkətinin istehsalı olan “ neftlə çirklənmiş torpaqların yuma üsulu ilə təmizlənməsi qurğusu” ilə tanış olmuş və bu qurğunun QSC-nin fəaliyyət sahələrinə tətbiqinin mümkünlüyü barədə müzakirələr aparılmışdır. Qərara alınmışdır ki, bununla əlaqədar istehsalat sahələri ilə tanışlığa və qarşılıqlı əlaqələrə ehtiyac vardır.
Bu məqsədlə də avqustun 9-da “Diemme S.P.A.” şirkətinin nümayəndələri, Danilo Bettoli və Davide Collini Bakıya xidməti ezamiyyətə gəlmişlər. Ötən gün qonaqlar QSC-nin istehsalat sahələrində və NQÇİ-də həyata keçirdiyi layihə ərazilərində olmuşlar. İtaliyalı mütəxəssislər neftşlamın emalı, sənaye çirkab sularının və neftlə çirklənmiş torpaqların təmizlənməsi prosesləri, eləcə də bu ərazilərdəki torpaqların və neftşlamın xüsusiyyətləri ilə yaxından tanış olmuşlar. QSC-nin rəhbərliyi və mütəxəssisləri qonaqları maraqlandıran sualları cavablandırmışlar.
Avqustun 10-da baş ofisdə QSC-nin rəhbərliyi ilə Danilo Bettoli və Davide Collini arasında görüş keçirilmişdir. QSC-nin baş direktoru Ramil Əliyev öncə qonaqları salamlamış və rəhbərlik etdiyi şirkət haqqında onlara geniş məlumat vermişdir. R.Əliyev bu gün Azərbaycanda neftlə çirklənmiş torpaqların təmizlənməsi işlərinin geniş vüsət aldığını və bu sahəyə yeni texnika və texnologiyaların tətbiq olunmasına zərurət yarandığını qonaqların diqqətinə çatdırmışdır. Baş direktor İtaliyada ezamiyyətdə olarkən “Diemme S.P.A.” şirkətinin “neftlə çirklənmiş torpaqların yuma üsulu ilə təmizlənməsi qurğusu” ilə tanış olduğunu və bu qurğunun böyük maraq doğurduğunu qeyd etmişdir.
İtaliyalı qonaqlar səmimi qəbul üçün QSC rəhbərliyinə minnətdarlıqlarını bildirmiş, Bakı şəhəri, eləcə də QSC-nin istehsalat sahələri ilə tanışlığın onlarda çox xoş təəssürat yaratdığını xüsusilə vurğulamışlar. Daha sonra görüş iştirakçıları neftlə çirklənmiş torpaqların təmizlənməsi metodları, yeni texnologiyaların tətbiqi və bu sahədə QSC ilə “Diemme S.P.A.” şirkəti arasında əməkdaşlıq məsələləri müzakirə edilmişdir.
Müzakirələr zamanı qərara alınmışdır ki, yeni qurğuların seçilməsi və tətbiqi təmizlənəcək neftşlamın və çirklənmiş torpaqların xarakterindən bir başa asılıdır. Odur ki, QSC həm neftşlam, həm də təmizlənəcək torpaq nümunələrini laborator tədqiqatlar üçün, xüsusi formada “Diemme S.P.A.” şirkətinə göndərməli və analizlərin nəticəsindən asılı olaraq Şirkət öz qurğularını təklif etməlidir. Daha sonra QSC-nin rəhbərliyi və mütəxəssislərinin iştirakı ilə, torpaqların təmizlənməsi, uyğun texnika və texnologiyaların tətbiqi sahəsində geniş fikir mübadiləsi aparılmışdır.
Görüşün sonunda “Ekol Mühəndislik Xidmətləri” QSC-nin baş direktoru Ramil Əliyev görüşdə iştirak etdiklərinə və maraqlı müzakirələrə görə italiyalı qonaqlara öz təşəkkürünü bildirmişdir. R.Əliyev QSC ilə “Diemme S.P.A.” şirkətinin əməkdaşlıq əlaqələrinin yaranmasından məmnunluq hissi keçirdiyini və bu əməkdaşlığa hər zaman hazır olduqlarını qeyd etmişdir.
tarix : 10.08.2011
|