|
“Ekol Mühəndislik Xidmətləri” QSC-nin çoxşaxəli fəaliyyət sahələri, həyata keçirdiyi prioritet ekoloji layihələr və modern maddi-texniki bazaya malik olması təkcə respublikamızda deyil, xarici dövlətlərdə fəaliyyət göstərən analoji şirkətlərin də böyük marağına səbəb olmuşdur. Elə buna görə də, son illərdə bir çox xarici şirkətlər QSC ilə əməkdaşlıq əlaqələrinin qurulmasına maraq göstərir və bu istiqamətdə silsilə görüşlər keçirilir. Belə növbəti görüşlərdən biri də avqustun 17-də, QSC-nin baş ofisində Rusiya FR-da fəaliyyət göstərən “Mirriko” ŞQ –nun təşəbbüsü ilə keçirilmişdir.
Görüşdə “Ekol Mühəndislik Xidmətləri” QSC-nin baş direktorunun istehsalat üzrə müavini-texniki direktor Məzahir Hüseynov, baş direktorun ümumi işlər üzrə müavini İsrafil Əliyev, baş direktorun SƏTƏM üzrə müavini Rəşad İsmayılov, müvafiq departament rəisləri və mütəxəssislər iştirak etmişlər. “Mirriko” ŞQ-dan isə görüşə, “Qazma Məhlulları Xidməti” MMC-nin direktoru Eduard Baytimirov, İnkişaf şöbəsinin rəisi Andrey Qladkov, modelləşdirmə və analizlər şöbəsinin rəisi Andrey Barmin, Neftşlamın utilizasiyası şöbəsinin rəhbəri Andrey Sprixin, Regional nümayəndəliyin direktoru Cavanşir Nurəliyev və satış üzrə mütəxəssis Ceyhun Nurəliyev qatılmışlar.
Görüş zamanı tərəflər öz fəaliyyət sahələri və texniki imkanları barədə biri-birlərinə geniş məlumat vermiş, eyni zamanda “Mirriko” ŞQ-nun təqdimatı keçirilmişdir. Təqdimat maraqla qarşılanmışdır. “Mirriko” ŞQ-nun nümayəndələri ŞQ-nun neftlə çirklənmiş torpaqların və sənaye-çirkab suların təmizlənməsi, neftşlamın utilizasiyası sahəsində geniş təcrübəyə və texniki imkanlara malik olduqlarını, bu sahədə bir çox layihələr həyata keçirdiklərini QSC rəhbərliyinin diqqətinə çatdırmışlar. Qonaqlar “Ekol Mühəndislik Xidmətləri” QSC-ni də ekoloji yönümlü layihələri yerinə yetirən və inkişaf etmiş bir şirkət kimi tanıdıqlarını qeyd edərək, QSC ilə əməkdaşlıq etmək niyyətində olduqlarını bildirmişlər.
QSC rəhbərliyi öz fəaliyyətlərində dünya təcrübəsinin əldə olunmasına, xarici əlaqələrin genişləndirilməsinə və analoji şirkətlərlə əməkdaşlıq əlaqələrinin qurulmasına daimi maraqlı olduqlarını rusiyalı həmkarlarının nəzərinə çatdırmışlar.
Avqustun 18-də ŞQ-nun nümayəndələri QSC-nin istehsalat sahələrində olmuş, sənaye-çirkab sularının, parafinin təmizlənməsi, neftşlamın emalı və zərərsizləşdirilməsi ilə maraqlanmışlar. Texnoloji proseslər haqqında mütəxəssislər arasında geniş müzakirələr aparılmışdır. Sonda gələcəkdə əməkdaşlıq əlaqələrinin qurulması məqsədilə, texnoloji proseslərin daha da modernləşdirilməsi və nanotexnologiyaların tətbiqi sahəsində “Mirriko” ŞQ-nun nümayəndələri qarşısında məsələlər qoyulmuş və təkliflər paketinin hazırlanıb təqdim olunması qərara alınmışdır.
tarix : 19.08.2011
|
ana səhifə
Satınalma
əlaqə
Futzal
Alternativ Enerji
Bu maraqlıdır
