ARDNŞ-nin neft sənayesi sahələrində ekoloji vəziyyətin yaxşılaşdırılması sahəsində tədbirlər davam edir. Bu tədbirlər planı çərçivəsində “Ekol Mühəndislik Xidmətləri” QSC-nin 2011-ci ildə NQÇİ-nin mədən ərazilərində həyata keçirdiyi ekoloji layihələr keyfiyyətlə və vaxtında icra olunur və bu ərazilərin əvvəlki görkəmi özünə qaytarılır.
QSC-nin 2011-ci ildə icrasına başladığı “Azneft” İB-nin Z.Tağıyev adına NQÇİ-nin köhnə Qala yatağındakı Qala gölünün ətrafında və Qaraçuxur İNM-nin mədən ərazilərində neftlə çirklənmiş torpaqların təmizlənməsi layihələri uğurla başa çatdırılaraq sifarişçiyə təhvil verilmişdir. Hazırda Ə.Əmirov adına NQÇİ-nin və “Balaxanıneft” NQÇİ-nin 2-ci mədən ərazilərində neftşlamın bioremediasiyası, Z.Tağıyev adına NQÇİ-nin 4-cü mədən ərazisində isə neftlə çirklənmiş torpaqların təmizlənməsi layihələri yüksək templə davam etdirilir.
QSC-nin həyata keçirdiyi Z. Tağıyev adına NQÇİ-nin 4-cü mədən ərazisində neftlə çirklənmiş torpaqların təmizlənməsi layihəsi üzrə ümumi sahəsi 265 hektar olan ərazidə neftlə çirklənmiş ayrı-ayrı torpaq sahələrinin təmizlənməsi nəzərdə tutulmuşdur. Layihənin icrasına cari ilin may ayında başlanmış, sentyabr ayının ikinci ongünlüyü də daxil olmaqla 90 hektara qədər ərazi neftlə çirklənmədən təmizlənmişdir. Layihənin icra müddətində xüsusi texnika və ağır tonnajlı nəqliyyat vasitələri ilə əraziyə 520 min m3-ə qədər ştib daşınmış və ərazi daxilində 23 min m3-ə qədər torpaq yayılaraq relyefin hamarlanması işləri aparılmışdır.
Hazırda bu layihə üzrə işlər yekunlaşmaq üzrədir. QSC Layihənin nəzərdə tutulmuş müddətdə başa çatdırılması üçün zəruri tədbirlər həyata keçirir.
tarix : 19.09.2011
|