Hər il 20 sentyabr, “Neftçilər günü” respublikamızda böyük təntənə və bayram əhval – ruhiyyəsi ilə qeyd olunur, respublikamızın iqtisadiyyatının dinamik inkişafında misilsiz fədakarlıq göstərən bu peşə sahiblərinin əməyinə xüsusi diqqət və rəğbət göstərilir.
“Ekol Mühəndislik Xidmətləri” QSC də ötən illərdə olduğu kimi, cari ildə də “Neftçilər günü”nü layiqli töhfələrlə qarşılamışdır. ARDNŞ-nin neft sənayesi sahələrində ekoloji vəziyyətin yaxşılaşdırılmasına dair tədbirlər planına uyğun olaraq, QSC 2011-ci ilin müvafiq dövründə bir sıra aktual ekoloji layihələrin uğurla həyata keçirilməsinə müvəffəqiyyətlə nail olmuşdur.
Bununla yanaşı, “Ekol Mühəndislik Xidmətləri” QSC 20 sentyabrda “Neftçilər günü” münasibətilə paytaxta keçirilən rəsmi tədbirlərə də qatılmışdır. Milli parkda təşkil edilmiş sərgidə 15 metrlik stendlə təmsil olunmuş QSC özünün son nailiyyətlərini, yeni texnika və texnologiyalarını sərgi iştirakçılarına nümayiş etdirmişdir. Xüsusi zövqlə və əyani vasitələrlə tərtib edilmiş stend sərgi iştirakçılarında böyük maraq doğurmuşdur.
Axşam saatlarında sərgini seyr edən dövlət rəsmləri və ARDNŞ-nin rəhbərliyi “Ekol Mühəndislik Xidmətləri” QSC-nin stendinə də baxış keçirmişlər. QSC-nin baş direktoru Ramil Əliyev dövlət rəsmlərinə və ARDNŞ-nin prezidenti Rövnəq Abdullayevə görülmüş işlər və perspektiv planlar barədə qısa məlumat vermişdir. QSC-nin baş direktorun məlumatı və nümayiş etdirilən stendi dövlət rəsmlərinə xoş təəssürat bağışlamışdır. Milli parkda “Neftçilər günü”nə həsr olunmuş sərgi axşam saatlarınadək davam etmiş və paytaxt sakinləri tərəfindən maraqla izlənilmişdir.
Əvvəlki illərdə olduğu kimi, 2011-ci ildə də “Neftçilər günü” münasibətilə Azərbaycan Respublikası Prezidentinin müvafiq Sərəncamları ilə, neft sənayesinin inkişafındakı xidmətlərinə görə Dövlət Neft Şirkətinin bir sıra işçiləri orden və medallara layiq görülmüş, bəzi işçilərə isə Azərbaycan respublikası Prezidentinin fərdi təqaüdü verilmişdir.
Neftçilərin peşə bayramı ilə əlaqədar ARDNŞ- də geniş tədbir keçirilmiş, Şirkətin prezidenti cənab Rövnəq Abdullayevin 15 sentyabr 2011-ci il tarixli, 141 saylı əmri ilə müxtəlif struktur bölmələrində çalışan bir çox işçilər, “Neft və qaz sənayesinin inkişafında xüsusi xidmətlərinə görə” Fəxri Fərmanla təltif edilmişlər. Təltif olunanlar arasında “Ekol Mühəndislik Xidmətləri” QSC-nin Tullantıların emalı departamentinin texnoloji qurğuların operatoru Səmədov Rasim Abuzər oğlu və Nəqliyyat sexinin ekskavator maşinisti Ələsgərov Telman İsmayıl oğlu da olmuşlar.
tarix : 21.09.2011
|