Sentyabrın 22-də Bakıda, Avropa otelində Xəzər-Avropa İnteqrasiya İşgüzar Klubuna (CEIBC) üzvü olan şirkətlərin nümayəndələri ilə ARDNŞ-nin I-ci vitse-prezidenti Xoşbəxt Yusifzadə ilə görüş keçirilmişdir. Görüşə klub üzvləri ilə yanaşı Rusiya, Qazaxıstan, Türkiyə, Gürcüstan, Böyük Britaniya, Fransa, Ukrayna, Latviya, Litva, İran və digər ölkələrin diplomatik nümayəndələri də qatılmışlar. Bu görüşdə “Ekol Mühəndislik Xidmətləri” QSC-ni baş direktor Ramil Əliyev və baş direktorun SƏTƏM üzrə müavini Rəşad İsmayılov təmsil etmişlər.
Xoşbəxt Yusifzadə görüş iştirakçılarına neft sənayesi sahələrinin fəaliyyəti və perspektiv planları, Azərbaycanın 20 illik müstəqilliyi dövründə əldə olunan nailiyyətlər barədə geniş məlumat vermişdir. O, çıxışına davam edərək CEIBC-nin təkcə Azərbaycanda deyil, xarici ölkələrdə də mühüm və işgüzar fəaliyyəti barədə müsbət fikirlərini qeyd etmişdir.
ARDNŞ-nin I-ci vitse-prezidenti əsası ulu öndər Heydər Əliyev tərəfindən qoyulmuş yeni neft strategiyasının Respublika Prezidenti İlham Əliyev cənabları tərəfindən çox uğurla həyata keçirildiyini görüş iştirakçılarının diqqətinə çatdırmışdır. O, bildirmişdir ki, neft sənayesinin müasir tarixi “Azəri” , “Çıraq” və Xəzərin dərinsulu hissəsindəki “Günəşli” yataqlarının işlənməsi ilə başlanmışdır.
Görüş işgüzar və qarşılıqlı dialoq şəraitində keçmiş, ARDNŞ-nin I-ci vitse-prezidenti Xoşbəxt Yusifzadə iştirakçıları maraqlandıran sualları cavablandırmışdır. Görüşdə CEIBC-nun iştirakçılarına üzvlük sertifikatları da təqdim olunmuşdur. “Ekol Mühəndislik Xidmətləri” QSC-nin baş direktoru Ramil Əliyevə də Klubun gümüş üzvlük sertifikatı verilmişdir. QSC-nin baş direktoruna sertifikatı ARDNŞ-nin I-ci vitse-prezidenti Xoşbəxt Yusifzadə təqdim etmişdir. Sonda görüş iştirakçıları xatirə şəkli çəkdirmişlər.
tarix : 23.09.2011
|