Yeni Azərbaycan Partiyasının uğurlu və praqmatik siyasi kursu sayəsində Azərbaycan sürətli dinamik inkişafa, dünya dövlətlərinə inteqrasiyaya nail olmuş, daxili və xarici siyasətində müstəsna nailiyyətlər əldə etmişdir. Əsası ulu öndər Heydər Əliyev tərəfindən qoyulmuş YAP hazırda dünyanın nüfuzlu siyasi partiyaları sıralarında özünə layiqli yer tutmuşdur. 20 ilə yaxındır ki, iqtidarda olan Yeni Azərbaycan Partiyasının siyasi kursu partiyanın sədri, Azərbaycan Respublikasının Prezidenti cənab İlham Əliyev tərəfindən müdrikliklə həyata keçirilir. Bu tarixi həqiqətləri dərk edən Azərbaycan cəmiyyəti, xüsusilə ziyalılar və gənclər bu siyasi partiya ətrafında daha da sıx birləşərək, partiyanın siyasi kursunun uğurla davam etdirilməsində və respublikamızın ictimai-siyasi həyatında fəal iştirak edirlər. Hazırda 600 mindən çox ziyalı və gənc bu siyasi partiya ətrafında sıx birləşmişdir.
2006-cı ildə yaranmış və respublikamızda ekoloji vəziyyətin yaxşılaşdırılması sahəsində önəmli layihələr həyata keçirən “Ekol Mühəndislik Xidmətləri” QSC–nin kollektivi, hər zaman ölkəmizin ictimai-siyasi həyatında da fəallıq göstərmişdir. 2007-ci ildə QSC-nin fəallarının təşəbbüsü ilə Yeni Azərbaycan Partiyası, Nizami rayon təşkilatının “Ekol” ilk ərazi təşkilatı yaradılmışdır. Ərazi təşkilatı yarandığı ildən respublikamızın və Nizami rayon təşkilatının ictimai-siyasi həyatında ən fəal təşkilatlardan olmuş və dəfələrlə YAP Nizami rayon təşkilatının Fəxri Fərmanlarına layiq görülmüşdür. “Ekol” ilk ərazi təşkilatının sıraları günü-gündən artaraq möhkəmlənmişdir. 2007-ci ildə 17 nəfər üzvü olan ərazi təşkilatının hazırda 200 nəfərdən çox fəal üzvü vardır.
Yeni Azərbaycan Partiyasının nüfuzunun durmadan artması və respublikamızın ictimai-siyasi, iqtisadi həyatındakı misilsiz rolu daimi cəmiyyətin diqqət və maraq mərkəzindədir. Odur ki, siyasi əqidəsi yetkin olan insanlar böyük həvəslə YAP sıralarına daxil olmaq üçün təşəbbüs göstərirlər.
YAP “Ekol” ilk ərazi təşkilatında da partiyanın boy sıraları daimi dinamik inkişafdadır. Demək olar ki, hər ay QSC-nin ayrı-ayrı struktur bölmələrindən YAP-na üzv olmaq üçün müraciətlər olunur. 20 sentyabr “Neftçilər günü” və Azərbaycan Respublikasının müstəqilliyinin 20 illiyi ərəfəsində YAP “Ekol” ilk ərazi təşkilatında partiya sıralarına yeni qəbul olunmuş üzvlərə vəsiqələr təqdim edilmişdir. YAP-nın yeni üzvləri böyük sevinc hissi keçirdiklərini, üzvlük vəsiqəsini şərəflə daşıyacaqlarını və ictimai-siyasi həyatda daimi fəal olacaqlarını əminliklə bildirmişlər.
tarix : 26.09.2011
|