Azərbaycan Respublikasının dövlət müstəqilliyinin bərpasının 20–ci ildönümü ölkəmizdə dövlət səviyyəsində geniş qeyd olunur. 20 illik yubiley münasibətlə ölkəmizin hər yerində silsilə tədbirlər həyata keçirilir. Bu tədbirlər çərçivəsində respublikamızın qısa müddətdə qazandığı uğurları, müvəffəqiyyətləri və nailiyyətləri əyani olaraq nümayiş etdirmək məqsədilə, “Bakı Ekspo” sərgi mərkəzində “Azərbaycan 20 ildə “ adı altında Milli Sərgi təşkil olunmuşdur. Sərgi müstəqillik illərində Azərbaycan Respublikasının keçirdiyi zəngin inkişaf yolunda qazandığı parlaq qələbələri və nailiyyətləri təbliğ etmək məqsədini daşıyır.
Sentyabrın 27-də sərginin açılış mərasimi olmuşdur. Açılış mərasimində Azərbaycan Respublikasının Prezidenti İlham Əliyev, hökumət üzvləri, nazirlər, komitə sədrləri, diplomatik səfirliklərin nümayəndələri, respublikamızda fəaliyyət göstərən xarici və yerli şirkətlərin rəhbərləri iştirak etmişlər.
Qeyd etmək lazımdır ki, müəssisə, təşkilat və şirkətlərə müstəqillik dövründə əldə etdikləri nailiyyətləri nümayiş etdirmələri üçün əlverişli şəraitin yaradılması ilə yanaşı, sərgi qarşılıqlı əməkdaşlıq əlaqələrinin qurulması baxımından da mühüm əhəmiyyət kəsb edir.
Bu möhtəşəm sərgidə, respublikamızın ictimai-siyasi həyatında hər zaman fəallıq göstərən “Ekol Mühəndislik Xidmətləri” QSC də fəaliyyət sahələrini, həyata keçirdiyi aktual ekoloji layihələri və əldə etdiyi uğurlu nailiyyətləri əks etdirən maraqlı kompozisiyalı stendlə iştirak edir. Respublikamızda çirkab suların təmizlənməsi, neftşlamın emalı və zərərsizləşdirilməsi, neftlə çirklənmiş torpaqların rekultivasiyası və bioremediasiyası, yaşıllıqların salınması və aqrotexniki xidmətlərin göstərilməsi sahəsində potensial bir şirkət imici qazanmış “Ekol Mühəndislik Xidmətləri “QSC-nin nümayiş etdirdiyi stend sərgi iştirakçıları tərəfindən çox maraqla izlənilir.
Azərbaycan Respublikası Ticarət və Sənaye Palatası tərəfindən təşkil olunmuş “Azərbaycan 20 ildə “ adı altında Milli Sərginin sentyabrın 30-dək davam edəcəyi nəzərdə tutulmuşdur.
tarix : 27.09.2011
|