2011-ci ildə “Ekol Mühəndislik Xidmətləri” QSC-nin NQÇİ-nin mədən ərazilərində həyata keçirdiyi, neftlə çirklənmiş torpaqların təmizlənməsi layihələri üzrə işlər yüksək templə davam etdirilir. Hazırda QSC H.Z.Tağıyev adına NQÇİ-nin 4-cü (Buzovna və Maştağa sahələri) və “Balaxanıneft” NQÇİ-nin 7-ci mədən ərazilərində (Zabrat sahəsi) layihələrin icrasını təqvim planına uyğun olaraq yerinə yetirir.
İcra müddətində H.Z.Tağıyev adına NQÇİ-nin 4-cü mədən ərazisində neftlə çirklənmiş ayrı-ayrı sahələrə 650 min m3 torpaq daşınaraq yayılmış və 96 hektara qədər sahə çirklənmədən təmizlənmişdir. “Balaxanıneft” NQÇİ-nin 7-ci sahəsində də layihə işləri fasiləsiz olaraq yerinə yetirilərək, əraziyə 70 min m3 torpaq daşınmış, 5 hektara qədər sahə neftlə çirklənmədən təmizlənmişdir.
Layihə çərçivəsində görülmüş tədbirlər nəticəsində yaşayış məntəqələri ilə əhatə olunmuş bu ərazilərin ekoloji vəziyyəti xeyli dərəcədə yaxşılaşdırılmışdır. “Ekol Mühəndislik Xidmətləri” QSC istər neftlə çirklənmiş torpaqların təmizlənməsi, istərsə də digər ekoloji layihələrin keyfiyyətlə və vaxtında yerinə yetirilməsi məqsədilə bütün zəruri tədbirləri həyata keçirməkdədir.
tarix : 18.11.2011
|