Bu əlaqələrin davamı olaraq noyabrın 23-də “Munay-Ekologiya” Şirkətinin baş direktoru Duman Aripbayev QSC-də olmuş və rəhbərliklə işgüzar görüş keçirilmişdir. QSC-nin baş direktoru Ramil Əliyev qonağı səmimi salamlayaraq, “Munay-Ekologiya” Şirkətinin tanınmış bir şirkət olaraq Qazaxıstan Respublikasında müasir texnika və texnologiyalarla analoji ekoloji layihələr həyata keçirdiyi haqda məlumatlı olduğunu onun diqqətinə çatdırmışdır. O, bildirmişdir ki, elə bu səbəbdən də bu şirkətlə əməkdaşlıq əlaqələrinin yaradılmasında maraqlıdırlar.
“Munay-Ekologiya” Şirkətinin baş direktoru Duman Aripbayev səmimi qəbul üçün öz təşəkkürünü bildirmişdir. O, qeyd etmişdir ki, rəhbərlik etdiyi şirkət Qazaxıstanda QSC-nin fəaliyyət sahələri ilə analoji olaraq bir çox istiqamətlərdə aktual ekoloji layihələr həyata keçirir. Bu layihələrin vaxtında və keyfiyyətlə yerinə yetirilməsi isə yeni texnika və texnologiyaların tətbiqi zərurətini yaradır. Odur ki, şirkətimiz dünyanın bu sahədə tanınmış şirkətlərinin nanotexnologiyalarının istehsalata tətbiqi sahəsində daimi məqsədyönlü tədbirlər həyata keçirir. D.Aripbayev xüsusilə Almaniyanın Flottweg şirkətinin istehsalı olan Trikantr qurğusunun istehsalata tətbiqi nəticəsində əldə etdikləri uğurlu nəticələr barədə QSC rəhbərliyinə ətraflı məlumat vermişdir.
Duman Aripbayev qeyd etmişdir ki, həm “Ekol Mühəndislik Xidmətləri” QSC, həm də “Munay-Ekologiya” Şirkəti öz fəaliyyətləri ilə planetimizin ümumi ekoloji vəziyyətinin yaxşılaşdırılması missiyasının iştirakçılarıdırlar. Ona görə də şirkətlərimiz arasında əməkdaşlıq əlaqələrinin yaradılmasına və genişləndirilməsinə böyük önəm verirəm. QSC-nin baş direktoru Ramil Əliyev də, öz növbəsində analoji şirkətlərlə səmərəli və perspektivli əməkdaşlıq münasibətlərinin yaradılmasına hər zaman hazır olduqlarını qazaxıstanlı həmkarının diqqətinə çatdırmışdır.
İşgüzar şəraitdə keçən görüşdə yeni, müasir qurğuların istehsalata tətbiqi sahəsində ətraflı fikir mübadiləsi aparılmış və gələcəkdə qarşılıqlı əlaqələrin yaradılması, eləcə də şirkətlərin ikitərəfli təcrübələrdən bəhrələnməsi məsələləri geniş müzakirə edilmişdir.