|
Dekabrın 8-də “Ekol Mühəndislik Xidmətləri” QSC-nin baş ofisində Latviyanın Azərbaycandakı səfiri Hardiys Baumanis başda olmaqla səfirliyin nümayəndələri ilə QSC rəhbərliyinin işgüzar görüşü keçirilmişdir. Görüşdə QSC-nin baş direktoru Ramil Əliyev qonaqları səmimi salamlayaraq bu görüşdən böyük məmnunluq hissi keçirdiyini bildirmişdir. Baş direktor qeyd etmişdir ki, Azərbaycan-Latviya dostluq əlaqələrinin dərin tarixi kökləri vardır. Ölkələrimizin müstəqillik illərində isə dövlət başçılarımızın ardıcıl səyləri nəticəsində bütün sahələrdə əməkdaşlıq əlaqələri daha da genişlənmiş və daha da inkişaf etmişdir.
Ramil Əliyev qeyd etdi ki, ölkələrimiz arasındakı münasibətlər qarşılıqlı maraqlar və qarşılıqlı hörmət üzərində qurulmuş münasibətlərdir. Şübhə yox ki, iki ölkə rəhbərliyinin apardığı məqsədyönlü siyasət nəticəsində növbəti illərdə də ikitərəfli münasibətlər daha da güclənəcək, daha çox sahələri əhatə edəcəkdir. O, QSC-nin yaranma tarixi və fəaliyyəti haqqında qonaqlara ətraflı məlumat verdi.
Latviyanın Azərbaycandakı səfiri Hardiys Baumanis səmimi qəbul üçün QSC rəhbərliyinə öz minnətdarlığını bildirdi. Səfir Azərbaycan-Latviya əməkdaşlığının hərtərəfli inkişaf mərhələsində olduğunu görüş iştirakçılarının diqqətinə çatdırdı. H.Baumanis bildirdi ki, Azərbaycan Respublikasının Prezidenti cənab İlham Əliyevin Latviya Respublikasına səfəri zamanı Latviya Prezidenti ilə, Baş Nazirlə və İqtisadiyyat Naziri ilə işgüzar görüşləri ölkələrimiz arasında iqtisadi, siyasi, mədəni və ekologiya sahəsində əlaqələrin daha da genişlənməsinə və Birgə Müəssisələrin yaradılmasına böyük təkan verdi.
Hardiys Baumanis bu görüşün vaxtında və əhəmiyyətli bir görüş olduğunu, “Ekol Mühəndislik Xidmətləri” QSC-nin aktual ekoloji layihələr həyata keçirən bir şirkət kimi tanındığını xüsusilə qeyd etdi. O, bildirdi ki, çox yaxşı olar ki, növbəti görüşlər Latviyanın analoji şirkətlərinin iştirakı ilə keçirilsin. Bu gün ekoloji problemlərin həlli bizim üçün də çox önəmli bir məsələdir. Odur ki, Latviya rəsmləri və əlaqədar nümayəndə heyəti Bakıda keçirilən neft-qaz və ətraf mühitin mühafizəsinə həsr olunmuş sərgi-konfransda həvəslə iştirak etmiş, xüsusilə ekologiya sahəsində Birgə Müəssisələrin yaradılmasını dəstəkləmişlər. Bu tədbirlərdə ekologiya sahəsində yeni texnika və texnologiyaların mənimsənilməsi və təcrübə mübadiləsinin aparılması məsələləri müzakirə olunmuşdur.
Səfir qeyd etmişdir ki, Latviya o qədər də böyük dövlət deyildir. Ona görə də ölkədə ekologiya sahəsində fəaliyyət göstərən şirkətlərin sayı azdır. Bununla yanaşı Latviya Respublikasında ekoloji layihələrin həyata keçirilməsi sahəsində tanınmış “VentEko” ASC və “BAO” SC fəaliyyət göstərir.
Görüşdə qərara alınmışdır ki, “Ekol Mühəndislik Xidmətləri” QSC ilə Latviyanın analoji şirkətləri arasında ekologiya sahəsində əlaqələrin genişləndirilməsi üçün qarşılıqlı səylərin artırılmasına və şirkətlərin fəaliyyəti ilə yaxından tanış olmağa zəruri ehtiyac vardır.
QSC-nin baş direktoru Ramil Əliyev vaxt tapıb bu görüşdə iştirak etdiyinə görə Latviyanın Azərbaycandakı səfiri Hardiys Baumanisə öz dərin təşəkkürünü bildirdi və qarşılıqlı əməkdaşlığa hər zaman hazır olduqlarını qeyd etdi. O, əmin olduğunu bildirdi ki, keçirilən bu görüş qısa zamanda öz müsbət nəticələrini verəcək və Latviyada fəaliyyət göstərən analoji şirkətlərlə əməkdaşlıq əlaqələrinin qurulmasına zəmin yaradacaqdır.
Səfir Hardiys Baumanis də öz növbəsində söylənənlərlə həmfikir olduğunu vurğulayaraq, işgüzar və səmimi şəraitdə keçən görüşə görə QSC rəhbərliyinə dərin təşəkkürünü bildirmişdir.
Sonda qonaqlara QSC-nin simvolik hədiyyələri təqdim olunmuş və xatirə şəkili çəkilmişdir.
tarix : 09.12.2011
|
ana səhifə
Satınalma
əlaqə
Futzal
Alternativ Enerji
Bu maraqlıdır
