“Ekol Mühəndislik Xidmətləri” QSC-nin maddi texniki bazasının gücləndirilməsi və nanotexnologiyaların istehsalata tətbiqi sahəsində məqsədyönlü tədbirlər həyata keçirilir və dünyanın bir çox dövlətlərində fəaliyyət göstərən analoji şirkətlərlə əməkdaşlıq əlaqələri genişləndirilir. Bu tədbirlər çərçivəsində QSC-nin baş direktoru Ramil Əliyev, baş direktorun istehsalat üzrə müavini-texniki direktor Məzahir Hüseynov, baş direktorun SƏTƏM üzrə müavini Rəşad İsmayılov, Marketinq və xarici iqtisadi əlaqələr şöbəsinin rəisi Rövşən Fətullayev dekabrın 12-dən 19-dək Belçika, İsveç və İngiltərə dövlətlərində xidməti ezamiyyətdə olmuşlar.
Ezamiyyə müddətində QSC-nin rəhbərliyi Belçikanın Brüssel şəhərindəki “SİTA Remediation” şirkətinin baş ofisində, bu şirkətin Biznesin inkişafı üzrə meneceri Steve Leroi və Torpaq təmizləmə üzrə mütəxəssis Pietro Perseo ilə işgüzar görüş keçirmişlər. Görüş zamanı şirkətlər öz fəaliyyətləri barədə biri-birlərinə məlumat vermiş və əməkdaşlıq əlaqələrinin mümkün variantları müzakirə edilmişdir. Sonra QSC-nin nümayəndə heyəti “SİTA Remediation” şirkətinin məhsuldarlığı 50 ton/saat olan “Yuma üsulu ilə torpaqların təmizlənməsi qurğusu”na baxış keçirmiş, qurğunun iş prinsipi ilə yaxından tanış olmuşlar.
“Ekol Mühəndislik Xidmətləri” QSC-nin nümayəndə heyəti səfər çərçivəsində İngiltərənin paytaxtı London şəhərindəki “Oil Pollution Services” LTD şirkətinin baş ofisində şirkətin səhmdarı Martin Owenlə də görüş keçirmişlər. Görüşdə neftlə çirklənmiş torpaqların təmizlənməsi üsulları və bu sahəyə nanotexnologiyaların tətbiqi məsələləri üzərində fikir mübadiləsi aparılmış və əməkdaşlıq əlaqələrinin yaradılması yolları araşdırılmışdır.
Səfər müddətində QSC-nin rəhbərliyi İngiltərənin Çesterfild şəhərində “SİTA Remediation” şirkətinin gücü 25 ton/saat olan “Yandırma üsulu ilə torpaqların təmizlənməsi qurğusu ilə də tanış olmuşlar. İsveçin Ystad şəhərində isə “Oil Pollution Services” LTD şirkətinin Satış və marketinq üzrə meneceri Goral Palmqvistlə görüş keçirilmiş, bu şirkətin gücü 40 ton/saat olan “Yuma üsulu ilə torpaqların təmizlənməsi qurğusu”na baxış keçirilmişdir. QSC-nin nümayəndə heyəti bu qurğuların iş prinsipi və texniki parametrləri ilə diqqətlə maraqlanmışlar.
Ümumiyyətlə QSC rəhbərliyinin həyata keçirdiyi bu xidməti ezamiyyət çox səmərəli keçmiş, neftlə çirklənmiş torpaqların təmizlənməsi sahəsində bir sıra Avropa dövlətlərində tətbiq edilən ən müasir qurğular haqqında maraqlı məlumatlar əldə olunmuşdur. Bu səfər, eyni zamanda Avropanın inkişaf etmiş analoji şirkətləri ilə əməkdaşlıq əlaqələrinin yaranması üçün real imkanların aşkar olunması ilə də yadda qalmışdır.
tarix : 22.12.2011
|