Neftqazçıxarma idarələrinin mədən ərazilərində salınmış yaşıllıqların inkişaf etdirilməsi məqsədilə, QSC bitkilərə lazımı gübrələrin vaxtlı-vaxtında verilməsi, su təchizatının yaxşılaşdırılması və digər aqrotexniki xidmətlərin göstərilməsi üçün ən zəruri tədbirləri həyata keçirir. Xüsusilə su itkisinin qarşısının alınması və bitkilərin optimal rejimdə suvarılması məqsədilə, yaşıllıq sahələrində damcı üsulu ilə mexaniki suvarma sistemlərinin quraşdırılmasına üstünlük verilir.
Xidmət göstərdiyi bütün yaşıllıq sahələrinin mexaniki suvarma sistemləri ilə təmin olunmasını qarşıya məqsəd qoyan “Ekol Mühəndislik Xidmətləri” QSC, ötən il “Bibiheybətneft” NQÇİ-nin mədən ərazisində 22 hektardan çox sahədə damcı suvarma sistemlərini quraşdıraraq istismara vermişdir. Analoji sistemin digər xidmət sahələrində də quraşdırılması nəzərdə tutulmuşdur.
Bu istiqamətdə görülən tədbirlərin davamı olaraq, QSC 2012-ci ilin ilk ayında H.Z.Tağıyev adına NQÇİ-nin 2-ci mədən ərazisində (Qala qəsəbəsi), xidmət göstərdiyi 9 hektar yaşıllıq sahəsində olan 6 000 qədər müxtəlif ağac növlərinin, 1 500-ə qədər isə gül kollarının optimal suvarılması üçün damcı üsulu ilə mexaniki suvarma sistemlərinin quraşdırılmasına başlamışdır. Sistemin qısa vaxta quraşdırılıb istismara verilməsi planlaşdırılmışdır.
“Ekol Mühəndislik Xidmətləri” QSC xidmət göstərdiyi digər yaşıllıq sahələrinə də damcı üsulu ilə mexaniki suvarma sistemlərinin tətbiq edilməsi üçün zəruri hazırlıq işləri görür.