Azərbaycan Respublikası Prezidenti cənab İlham Əliyevin Sərəncamı ilə təsdiq edilmiş “2006-2010-cu illərdə Azərbaycan Respublikasında ekoloji vəziyyətin yaxşılaşdırılması üzrə Kompleks Tədbirlər Planı” çərçivəsində Bakı şəhərinin ekoloji vəziyyətinin yaxşılaşdırılması, köhnəlmiş sənaye obyektlərinin şəhər hüdudlarından kənara çıxarılması və çirklənmiş torpaqların təmizlənməsi sahəsində mühüm tədbirlər həyata keçirilmişdir. Bu tarixi Sərəncamla əlaqədar olaraq “Qara Şəhər” ərazisində də ekoloji yönümlü iri həcmli layihənin icrasına başlanılmışdır. Bu layihənin icrası ilə paytaxta yeni müasir mərkəzin yaradılması və buranın bundan sonra Bakı Ağ Şəhər adlandırılması nəzərdə tutulmuşdur.
Qeyd olunduğu kimi, “Ekol Mühəndislik Xidmətləri” QSC də bu nəhəng layihənin iştirakçısı olaraq, 2010-cu ilin fevral ayından Bakı Ağ Şəhər layihəsinin “Yaşıl ada” ərazisində köhnəlmiş neft sənaye obyektlərindən neftşlamın çıxarılaraq anbarlaşdırılması və ərazidəki neftlə çirklənmiş torpaqların təmizlənməsi işlərinin yerinə yetirilməsinə başlamışdır.
İcra müddətində QSC tərəfindən layihə ərazisindən 26 min m3-dən çox neftşlam çıxararaq müvafiq qaydada anbarlaşdırmış, 2012-ci ilin yanvar ayına qədər ərazidən 778 min m3 -dən çox neftlə çirklənmiş torpaq çıxarılaraq poliqona daşınmışdır. 14 hektara qədər sahə çirklənmədən təmizlənmişdir. Hazırda bu sahədə işlər davam etdirilir.
tarix : 24.01.2012
|