Yanvarın 27-də QSC-nin baş ofisində Almaniyanın GİCON firmasının nümayəndələri ilə tanışlıq xarakterli görüş keçirilmişdir. Görüşdə GİCON firmasının layihə rəhbəri Mathias du Puits, layihə eksperti Hartmurt Yunge, firmanın Azərbaycan nümayəndəsi, büro rəhbəri Səkinə Məhərrəmova və QSC-nin baş direktoru Ramil Əliyev başda olmaqla rəhbər heyəti iştirak etmişlər.
“Ekol Mühəndislik Xidmətləri” QSC-nin baş direktoru Ramil Əliyev qonaqları salamlayaraq görüş iştirakçılarını onlara təqdim etmiş və QSC haqqında qısa məlumat vermişdir.
GİCON firmasının layihə rəhbəri Mathias du Puits səmimi qəbula görə QSC rəhbərliyinə öz minnətdarlığını bildirərək, firma haqqında görüş iştirakçılarını məlumatlandırmışdır. O bildirmişdir ki, GİCON firması 20 ildən artıqdır ki, fəaliyyət göstərir və Almaniyanın ən böyük məsləhətçi firmalarından biridir. Firmanın nəzdində 2 böyük, ən müasir laboratoriya fəaliyyət göstərir. Firmada 250 nəfərdən çox peşəkar mütəxəssislər çalışır və illik gəlir 20 milyon ABŞ dolları təşkil edir.
İSO 9000, İSO 14000 və İSO 1700 standartları ilə fəaliyyət göstərən GİCON firması əsasən xüsusi tullantıların zərərsizləşdirilməsi, çirklənmiş torpaqların təmizlənməsi üçün rəylərin hazırlanması, torpağın, qruntun, suların və havanın çirklənmə səviyyəsinin müəyyənləşdirilməsi, eləcə də layihələrin planlaşdırılması və nəticələrin yoxlanması kimi fəaliyyət sahələri ilə məşğuldur. Firma eyni zamanda Avropa Birliyi, Federal Hakimiyyət və Ölkə Hakimiyyəti ilə müqavilədə müstəqil ekspert təşkilatı kimi fəaliyyət göstərir.
Mathias du Puits tanışlıq çərçivəsində qeyd etdi ki, GİCON firması təkcə Almaniyada deyil, eləcə də ABŞ-da, Rusiya FR-da, İngiltərədə və s. tanınmış məsləhətçi firma olaraq bir çox layihələr həyata keçirmişdir. Firma hazırda Azərbaycanda kimya sənayesi sahələrində xüsusi tullantıların idarə olunması sahəsində böyük bir layihənin planlaşdırılması ilə məşğuldur. Layihə rəhbəri bildirdi ki, bu görüşdə əsas məqsəd analoji fəaliyyət sahələri ilə tanınmış “Ekol Mühəndislik Xidmətləri” QSC ilə əməkdaşlıq əlaqələrinin mümkün variantlarını müzakirə etmək və buna təşəbbüs göstərməkdir.
QSC-nin baş direktoru Ramil Əliyev maraqlı məlumat üçün Mathias du Puitsa öz minnətdarlığını bildirdi. Baş direktor qeyd etdi ki, “Ekol Mühəndislik Xidmətləri” QSC ətraf mühitin mühafizəsi və ekoloji vəziyyətin yaxşılaşdırılması sahəsində fəaliyyət göstərən dünyanın analoji şirkətləri ilə əməkdaşlıq etməyə hər zaman hazırdır. QSC-nin hazırda dünyanın 20-dən çox şirkəti ilə nanotexnologiyaların tətbiqi istiqamətində əməkdaşlığı uğurla davam edir.
Ramil Əliyev bildirdi ki, GİCON firması da aktual ekoloji layihələrlə məşğul olduğundan QSC bu firma ilə əməkdaşlıq etmək marağındadır. Bunun üçün qarşılıqlı görüşlərin artırılmasına və ikitərəfli konkret təkliflərin hazırlanıb təqdim edilməsinə səyləri artırmalıyıq.
GİCON firmasının layihə rəhbəri Mathias du Puits QSC-nin baş direktoru Ramil Əliyevlə həmfikir olduğunu qeyd edərək, səmimi və işgüzar şəraitdə keçən görüş üçün minnətdarlığını bildirmişdir. Bununla da görüş başa çatmışdır.
tarix : 30.01.2012
|