Fevralın 2-də başlayan güclü qar və çovğun  şəhər təsərrüfatında olduğu kimi  istehsalat müəssisələrində də ciddi çətinliklər yaratmışdır. Çətin hava şəraitində  “Ekol Mühəndislik Xidmətləri” QSC-nin istehsalat sahələri də müəyyən çətinliklərlə üzləşmişdir. Bütün bunlara baxmayaraq QSC-nin kollektivi bu günlərdə güclənmiş iş rejimində çalışmış,  yaranmış problemlər qısa müddətdə  aradan qaldırılaraq istehsalatın fasiləsizliyini təmin edilmişdir.

    Bu günlərdə QSC-nin əsas sifarişçilərindən olan, Heydər Əliyev adına BNEZ-dan və “Azərneftyağ” NEZ-dan daxil olan sənaye çirkab sularının təmizlənməsi Tullantıların emalı departamenti (TED) tərəfindən  fasiləsiz olaraq həyata keçirilmişdir. İstehsalat sahələrində olan mexaniki təmizləyici qurğuların, siyirtmələrin, nasosların və boru xətlərinin  donmaması üçün  TED-nin və Elektromexanika sexinin kollektivi gərgin əmək sərf etmişlər. Neftşlamın  fasiləsiz emalı və zərərsizləşdirilməsi  məqsədilə, hava şəraitinin  dekantr qurğularının işinə  göstərə biləcəyi mənfi təsirlərin qarşısının alınması üçün qabaqlayıcı tədbirlər görülmüşdür.

    Fevralın 2-dən QSC-nin İnzibati təsərrüfat şöbəsinin (İTŞ) kollektivi də gücləndirilmiş iş rejimində fəaliyyət göstərmiş,  inzibati və məişət binalarının  su və istilik enerjisi ilə, eləcə də işçiləri isti  yeməklə  fasiləsiz təmin etməyə nail olmuşlar. İstehsalat sahələrindəki  yollar və sahələr qardan təmizlənmişdir.

    Bununla belə,  çətin hava şəraiti ilə əlaqədar QSC-nin neftqazçıxarma idarələrinin mədən ərazilərində həyata keçirdiyi ekoloji layihələrin icrasında  fasilələr yaranmışdır. Hava şəraitinin yaxşılaşacağı  ilk gündən layihələrin icrasına başlanılacaqdır.

tarix : 03.02.2012