2011-ci ildə “Ekol Mühəndislik Xidmətləri” QSC bütün fəaliyyət sahələrində yadda qalan uğurlara imza atmışdır. Bu uğurların nəticəsi olaraq ötən maliyyə ilində QSC-nin balans mənfəəti 1 284,8 min manat olmuş, mənfəət vergisi 257,0 min manat hesablanmış, rentabellik səviyyəsi isə 3, 78 % təşkil etmişdir. Ötən il QSC-nin maliyyə, uçot və vergi siyasətinin şəffaf və beynəlxalq standartlara uyğun şəkildə həyata keçirilməsi üçün Maliyyə və uçot departamenti (MUD) də məqsədyönlü fəaliyyət göstərmişdir.
Beynəlxalq standartlara keçidlə əlaqədar, QSC-nin maliyyə, uçot və vergi siyasətinin standartlara uyğunlaşdırılması məqsədilə “Professional Maliyyə Menecerləri Assosiasiyası İctimai Birliyi “ Regional Mərkəzi (RM) ilə müqavilə imzalanmışdır. Müqaviləyə əsasən 2010-cu ildən başlayaraq RM-nin mütəxəssisləri tərəfindən MUD-nin 9 nəfər əməkdaşının iştirakı ilə Böyük Britaniyanın Sertifikatlaşdırılmış Maliyyə Menecerləri İnstitutunun “Maliyyə Hesabatlarının Beynəlxalq Standartlar” proqramı üzrə ixtisasartırma kursları keçirilmişdir. Kurslarda fəal iştirak edən MUD əməkdaşları bu proqramı tam mənimsəmiş və sertifikatlara layiq görülmüşlər. “PraysvoterhausKupers Audit Azərbaycan” MMC tərəfində keçirilən auditin nəticələri isə, QSC-nin 2010- 2011-ci illər üçün maliyyə hesabatlarının beynəlxalq standartlara uyğun tərtib və təqdim olunduğunu təsdiq etmişdir.
Ötən il maliyyə uçot hesabatlarının müasir formada hazırlanması məqsədilə MUD-də 1C proqramının tətbiqinə başlanılmış, proqramın mənimsənilməsi üçün departamentdə çalışan işçilərə vaxtaşırı treninqlər keçirilmişdir. Yeni proqram təminatının və beynəlxalq standartların tələblərinin tam mənimsənilməsi üçün departamentin əməkdaşlarına bütün lazımı şərait yaradılmışdır. Bununla yanaşı, müqavilə əsasında “English For Life” MMC Dil Kursları Şirkəti tərəfindən təşkil edilmiş kurslarda işçilərə ingilis dili lazımı səviyyədə öyrədilmişdir.
2011-ci ildə MUD-nin fəaliyyətinin əsas məqsədlərindən biri də QSC-nin ümumi xidmət vahidinə düşən xərclərə qənaət olunmaqla, daha çox mənfəət əldə etməkdən, işçilərin əmək haqlarının vaxtlı-vaxtında ödənilməsindən, maliyyə əməliyyatlarının və sosial məsələlərin operativ olaraq təmin edilməsindən ibarət olmuşdur ki, buna da əsasən əməl edilmişdir.
MUD-nin maliyyə əməliyyatlarının şəffaflığının təmin edilməsi və beynəlxalq standartlara cavab verəcək səviyyədə fəaliyyət göstərməsi ümumilikdə QSC-nin investisiya cəlbediciliyini xeyli dərəcədə artırmışdır. “Ekol Mühəndislik Xidmətləri” QSC-nin xarici əlaqələrinin günü-gündən genişlənməsi və bir çox xarici şirkətlərin əməkdaşlıq əlaqələrinin yaradılmasında maraqlı olması bütün bunların bariz nümunəsidir.
Bununla yanaşı, MUD-nin qarşısında duran vəzifələrdən ən əsası yaxın gələcəkdə QSC-nin maliyyə və uçot hesabatlarının beynəlxalq standartlara tam uyğun olaraq tərtib edilməsindən və maliyyə əməliyyatlarının şəffaflığının daha da artırılmasından ibarətdir ki, hazırda bu istiqamətdə də məqsədyönlü tədbirlər həyata keçirilməkdədir.
tarix : 16.02.2012
|