Xocalı soyqırımından 20 il ötməsinə baxmayaraq bu faciənin ildönümü hər il respublikamızın hər yerində, eləcə də diaspor təşkilatlarında geniş miqyasda qeyd olunur. Xocalı faciəsinin 20-ci ildönümü ilə əlaqədar fevralın 24-də “Ekol Mühəndislik Xidmətləri” QSC-də də geniş tədbirlər keçirilmiş, faciə qurbanlarının əziz xatirəsi böyük ehtiramla yad edilmişdir.
Tədbirdə çıxış edən QSC-nin baş direktoru Ramil Əliyev bildirdi ki, 1992-ci il fevralın 25-dən 26-na keçən gecə erməni cəlladları Xankəndində yerləşən 366-cı alayın yaxından köməkliyi ilə Xocalı şəhərini tamamilə yandırdılar. Şəhəri işğal etmiş erməni təcavüzkarları 613 dinc sakini, o cümlədən 106 qadını, 63 uşağı və 70 ahıl insanı amansızlıqla, 56 nəfəri xüsusi qəddarlıqla qətlə yetirmiş, 1275 nəfəri əsr götürmüş, 8 ailəni isə tamamilə məhv etmişlər. Bu bəşər tarixində törədilən ən ağır cinayətlərdən biridir.
Ramil Əliyev çıxışında vurğuladı ki, dövlət başçısı İlham Əliyevin 17 yanvar 2012-ci il tarixli “Xocalı soyqırımının 20-ci ildönümü haqqında” sərəncamında qeyd olunduğu kimi, azərbaycanlılara qarşı erməni şovinist dairələrinin XIX-XX əsrlərdə mərhələ-mərhələ həyata keçirdiyi etnik təmizləmə siyasətinin tərkib hissəsi olan Xocalı soyqırımı haqqında həqiqətlər dünya ictimaiyyətinə, xarici ölkələrin parlamentlərinə çatdırılmalıdır. Azərbaycan xalqının və ümumən insanlığın əleyhinə yönəldilmiş bu son dərəcə ağır hərbi cinayət beynəlxalq miqyasda öz hüquqi-siyasi qiymətini almalıdır.
Baş direktorun istehsalat üzrə müavini-texniki direktor Məzahir Hüseynov, baş direktorun məsləhətçisi Kamil Akimov, Ekoloji Monitorinq departamentinin rəisi Şahabiddin Albuşov, Tullantıların emalı departamentinin rəisi Zeynal Babayev, İctimai sosial şöbənin rəisi, YAP “Ekol” ilk ərazi təşkilatının sədri Fəxrəddin Quliyev və başqaları öz çıxışlarında Xocalı soyqırımının Ermənistanın Dağlıq Qarabağı işğal etmək məqsədi ilə apardığı işğalçılıq müharibəsinin gedişində dinc azərbaycanlı əhaliyə qarşı törətdiyi soyqırımı cinayətlərinin miqyasına görə ən dəhşətlisidir. Bu soyqırımı əsrin Xatın, Xirosima, Naqasaki və Sonqmi kimi dəhşətli faciələri ilə bir sırada dayanır. Xocalı soyqırımı əslində erməni təcavüzkarlarının yalnız Azərbaycan xalqına deyil, insanlığa qarşı yönəldilmiş ən ağır cinayətdir.
Çıxış edən natiqlər qətiyyətlə qeyd etdilər ki, qəddar üsullarla dinc insanları kütləvi qırğına məruz qoyan erməni millətçiləri tarix qarşısında öz çirkin əməllərini ört basdır etməyə çalışsalar da, ümumbəşəri dəyərlərlə, beynəlxalq hüquqi normalara əsaslanaraq düşünməyin və qərar qəbul etməyin zamanı çatmışdır. Nüfuzlu beynəlxalq təşkilatlar Azərbaycanın haqlı mövqeyini dəstəkləməli, işğalçı Ermənistan dövlətinə qarşı sərt sanksiyalar qəbul olunmalıdır.
Tədbirdə faciə qurbanlarının əziz xatirəsi bir dəqiqəlik sükutla yad edilmiş, qeyd olunmuşdur ki, Xocalı soyqırımı xalqımızın böyük dərdi, kədəri olmaqla yanaşı, eyni zamanda Azərbaycan xalqının qan yaddaşında öz milli azadlığı uğrunda keçdiyi şərəfli mübarizə yolu kimi qalacaqdır.
Xocalı soyqırımının 20-ci ildönümü ilə əlaqədar QSC-nin istehsalat sahələrində təşkil olunmuş stendlərin önünə tər çiçəklər düzülmüşdür.
tarix : 24.02.2012
|