Xəbər verildiyi kimi, “Ekol Mühəndislik Xidmətləri” QSC 2010-cu ildən başlayaraq Bakı Ağ Şəhər Layihəsinin icrasına qoşulmuşdur. Bu nəhəng layihənin iştirakçısı olaraq QSC “Yaşıl ada” ərazisinin köhnəlmiş neft sənaye obyektlərindən neftşlamın çıxarılması, anbarlaşdırılması və ərazidəki neftlə çirklənmiş torpaqların təmizlənməsi işlərini yerinə yetirir.
Fəaliyyətə başladığı müddətdən QSC layihənin fasiləsizliyini təmin etmiş, təqvim planında nəzərdə tutulan işlər vaxtlı-vaxtında və keyfiyyətlə yerinə yetirilmişdir. Qeyd olunduğu kimi, ilk öncə ərazidən 26 min m3-dən çox neftşlam çıxarılaraq anbarlaşdırılmış, 2012-ci ilin yanvar ayınadək ərazidən 778 min m3-dən çox neftlə çirklənmiş torpaq çıxarılaraq aidiyyəti üzrə poliqona daşınmışdır.
QSC 2012-ci ildə də ahəngdar iş rejimində fəaliyyət göstərmiş, yanvar-fevral aylarında layihə ərazisindən 57 min m3-dən çox neftlə çirklənmiş torpaq çıxarılmışdır. Ümumilikdə icra müddətində ərazidən 835 min m3 çirkli torpaq çıxarılmış, 15 hektara qədər sahə təmizlənmişdir. Hazırda layihə üzrə işlər yüksək templə davam etdirilir.
tarix : 05.03.2012
|