Xalqımızın ən əziz bayramlarından olan Novruz bayramı ilə əlaqədar respublikamızın hər yerində rəngarəng tədbirlər keçirilir. İnsanlar bu tədbirlərdə bayram əhval ruhiyyəsi ilə və həvəslə iştirak edir, milli-mənəvi dəyərlərimizi yaşadırlar.
Hər il olduğu kimi, bu il də “Ekol Mühəndislik Xidmətləri” QSC-də də rəhbərliyinin və Həmkarlar İttifaqı Komitəsinin təşkilatçılığı ilə Novruz bayramı münasibətilə bir sıra tədbirlər keçirilir. Nərd yarışları isə xüsusi maraqla qarşılanır. Martın 14-də növbəti nərd turniri təşkil olunmuşdur. Turnirdə QSC-nin ayrı-ayrı istehsalat sahələrindən kollektivin 30 nəfərə qədər nərd həvəskarı iştirak etmişlər.
Turnirin açılış mərasimində baş direktorunun istehsalat üzrə müavini-texniki direktor Məzahir Hüseynov öncə iştirakçıları Novruz bayramı münasibətilə təbrik etmiş və bu yarışda onlara uğurlar arzulamışdır. Həmkarlar İttifaqı Komitəsinin sədri Əli Ələkbərov da öz çıxışında turnir iştirakçılarını təbrik etmiş və onlara yarışın şərtlərini izah etmişdir. Sonra turnirə start verilmişdir.
Gərgin mübarizə şəraitində keçən turnirin final mərhələsində turnirin qalibləri müəyyən edilmişdir. 1-ci yerə İnzibati təsərrüfat şöbəsinin yardımçı fəhləsi Soltan Abduyev, 2-ci yerə Nəqliyyat sexinin sürücüsü Füzuli İsmayılov, 3-cü yerə isə İnzibati təsərrüfat şöbəsinin inzibatçısı Tərlan Əliyev layiq görülmüşlər.
Sonda qaliblərə xüsusi diplom və pul mükafatları təqdim olunmuş və xatirə şəkili çəkilmişdir.
tarix : 15.03.2012
|