Hər il yaz mövsümü ilə əlaqədar olaraq ARDNŞ-nin kollektivi iməciliklər keçirir, istehsalat sahələrində yaşıllaşdırma və abadlıq işləri aparılır. Martın 31-də ARDNŞ-nin rəhbərliyinin iştirakı ilə Şirkətin bütün idarə və müəssisələrində növbəti genişmiqyaslı ağacəkmə aksiyası keçirilmişdir. İməcilikdə Şirkətin idarə və müəssisələrinin kollektivləri fəal iştirak etmiş, ağaclar əkilmiş, əvvəllər salınmış yaşıllıqlara qulluq olunmuş, abadlıq işləri aparılmışdır.
Həmin gün ARDNŞ-nin prezidenti Rövnəq Abdullayev ayrı-ayrı idarə və müəssisələrin istehsalat sahələrində, eləcə də neftlə çirklənmədən təmizlənmiş “Bibiheybətneft” NQÇİ-nin mədən ərazisində olmuş, ümumi ekoloji vəziyyətlə və yaşıllaşdırma ilə maraqlanmış, ağac əkmişdir.
Rövnəq Abdullayev KİV-nin nümayəndələrinə bildirmişdir ki, ARDNŞ-nin 20 minə yaxın əməkçisinin qatıldığı bu möhtəşəm iməcilikdə ümumilikdə 20 mindən çox ağac və gül kolları əkilmiş, böyük abadlıq işləri görülmüşdür. O bildirmişdir ki, ərazinin təbii xüsusiyyətləri nəzərə alınaraq əkilmiş ağaclar arasında küknar, şam, sərv, şümşad, evkalipt, zeytun, eldar şamı, meyvə ağaclarına, həmçinin qızılgül və dekorativ gül kollarına üstünlük verilmişdir. ARDNŞ-nin prezidenti neft-qaz hasilatı və emalı sahələrində ekoloji təhlükəsizliyin təmin olunması istiqamətində görülən mühüm işlərin davamlı olacağını bildirmişdir.
“Ekol Mühəndislik Xidmətləri” QSC-nin kollektivi də martın 31-də keçirilən möhtəşəm iməciliyə qatılmışdır. İməcilikdə QSC-nin rəhbərliyi başda olmaqla ayrı-ayrı istehsalat sahələrində kollektivin 200 nəfərdən artıq nümayəndəsi iştirak etmişdir. Yaz mövsümü ilə əlaqədar əsas diqqət yeni ağacların əkilməsinə və əvvəllər əkilmiş ağaclara qulluq göstərilməsinə yönəldilmişdir. Tədbirdə “Bibiheybətneft” NQÇİ-nin neftlə çirklənmədən təmizlənmiş mədən ərazisinin QSC-nin xidmət göstərdiyi yaşıllaşdırma sahəsində 765 ədəd eldar şamı, H.Z. Tağıyev adına NQÇİ-nin Qala sahəsində 51 ədəd eldar şamı, 800 ədəd mövsümü gül kolları, “Abşeronneft” NQÇİ-nin yaşıllaşdırma sahəsində isə 500 ədəd eldar şamı əkilmiş, bitkilərə aqrotexniki xidmət göstərilmişdir. İməcilikdə Heydər Əliyev adına BNEZ-nun və “Azərneftyağ” NEZ-nun ərazilərindəki QSC-nin xidmət göstərdiyi sahələrdə, eləcə də digər istehsalat sahələrində xeyli təmizlik və abadlıq işləri aparılmışdır.
Yaz mövsümü ilə əlaqədar olaraq QSC-nin istehsalat sahələrinin yaşıllaşdırılması və abadlaşdırılması tədbirlərinin davam etdirilməsi nəzərdə tutulur.
tarix : 02.04.2012
|