Hər il ABŞ-nın Texas ştatının Hyuston şəhərində keçirilən Beynəlxalq Konfrans və sərgi, dünya ölkələrinin neft-qaz sənayesi və ətraf mühitin mühafizəsi sahəsində istehsal olunan yeni texnologiyaların nümayiş etdirilməsi və öyrənilməsi məqsədilə dünyanın hər yerindən bu sahələrə aid olan mütəxəssisləri bir araya gətirir. Bu ilki Konfrans-sərginin geniş diapozonlu texniki proqramına yüzlərlə rəsmi prezentasiyalar və xüsusi diskusiyalar daxil olunmuş, 2 mindən çox şirkət sərgidə öz yeni qurğu və avadanlıqlarını nümayiş etdirmişlər.
Bu mötəbər tədbirə “Ekol Mühəndislik Xidmətləri” QSC-nin nümayəndələri də qatılmışlar. “Ətraf mühitin qorunması” məsələlərinə həsr olunmuş Beynəlxalq sərgidə iştirak etmək üçün QSC-nin baş direktorunun ümumi işlər üzrə müavini İsrafil Əliyev, baş direktorun SƏTƏM üzrə müavini Rəşad İsmayılov, Marketinq və xarici iqtisadi əlaqələr şöbəsinin rəisi Rövşən Fətullayev aprelin 28-dən mayın 4-dək ABŞ-nın Texas ştatının Hyuston şəhərində xidməti ezamiyyətdə olmuşlar. Ezamiyyə müddətində QSC nümayəndələri dünyanın qabaqcıl şirkətlərinin ətraf mühitin mühafizəsi sahəsində sərgidə nümayiş etdirdikləri müasir texnologiyalar, qurğu və avadanlıqlarla yaxından maraqlanmışlar. Nümayəndələrimiz eyni zamanda “Netzsch”, “Bornemann Pumps”, “DPS Protec” “TSC Offshore”, “Jereh Energy Services Corporation” və digər şirkətlərin təmsilçiləri ilə fikir mübadiləsi aparmış, gələcək əməkdaşlıq münasibətlərinin mümkün variantları müzakirə olunmuşdur. Dörd gün davam edən sərgidə təmsilçilərimiz kifayət qədər maraqlı məlumatlar əldə etmişlər.
tarix : 08.05.2012
|