Mayın 07-də “Ekol Mühəndislik Xidmətləri” QSC-nin baş ofisində ABŞ-nın “ARGUS” şirkətinin nümayəndələri ilə görüş keçirilmişdir. Görüşdə ARDNŞ-nin Ekoloji Layihələrin Ekspertizası şöbəsinin, Ekologiya İdarəsinin və QSC-nin rəhbər işçiləri, mütəxəssisləri, eləcə də “ARGUS” şirkətinin nümayəndələri iştirak etmişlər.
QSC-nin baş direktorunun SƏTƏM üzrə müavini Rəşad İsmayılov iştirakçılarını salamlayaraq, qonaqlara “Ekol Mühəndislik Xidmətləri” QSC haqqında qısa məlumat vermişdir. Rəşad İsmayılov neftşlamın emalı, sənaye çirkab sularının və neftlə çirklənmiş torpaqların təmizlənməsi sahəsində yeni texnologiyaların istehsalata tətbiqi sahəsində maraqlı olduqlarını və bu məqsədlə də analoji şirkətlərlə əməkdaşlığa hər zaman hazır olduqlarını qonaqların diqqətinə çatdırmışdır.
Rəşad İsmayılov qeyd etmişdir ki, ARGUS şirkəti neftşlamı termik üsulla emal edən qurğuların istehsalı sahəsində tanınmış bir şirkətdir. Odur ki, bu şirkətlə əməkdaşlıq etmək məqsədilə xeyli vaxtdır ki, yazışmalar aparılır və qurğuların texniki xarakteristikaları öyrənilir.
ARGUS şirkətinin nümayəndələri, vitse-prezident Dmitriy Kanevskiy və Sergey Razlivkin səmimi qəbula görə QSC rəhbərliyinə öz minnətdarlıqlarını bildirmiş və təmsil etdikləri şirkət haqqında görüş iştirakçılarını məlumatlandırmışlar. Sonra onlar ARGUS şirkətinin istehsalı olan Termo Dezorpsiya qurğusunun texniki xarakteristikaları, iş prinsipi haqqında geniş məlumat vermişlər.
Görüşdə qurğunun məhsuldarlığı, texniki parametrləri, enerji sərfi, qurğunun çatdırılması, quraşdırılması, təmiri və digər məsələlər ətrafında geniş müzakirələr aparılmışdır. Qərara alınmışdır ki, suallar toplusu əsasında müzakirələr son mərhələyədək davam etdirilsin.
tarix : 09.05.2012
|