Respublikamızın hər yerində olduğu kimi, xalqımızın ümummilli lideri Heydər Əliyevin anadan olmasının 89-cu ildönümü “Ekol Mühəndislik Xidmətləri” QSC-də də bir sıra tədbirlərlə qeyd olunmuşdur. İl dönümü ərəfəsində QSC-də iməcilik təşkil olunmuş, əmək kollektivləri arasında nərd turniri keçirilmişdir.
Mayın 10-da isə QSC-nin kollektivi Heydər Əliyevin adını daşıdığı BNEZ ərazisindəki abidəsi önünə tər çiçəklər düzmüş, onun əziz xatirəsini ehtiramla yad etmişlər. Tədbir QSC-nin baş ofisində ulu öndərin 89-cu ildönümünə həsr olunmuş anım mərasimi ilə davam etmişdir.
Mərasimdə çıxış edənlər həyatını xalqına həsr etmiş ümummilli lider Heydər Əliyevin müstəqilliyimizin əldə edilməsi, suverenliyimizin qorunub saxlanılması, respublikamızın iqtisadi qüdrətinin yüksəldilməsi istiqamətində gördüyü işlərdən və onun həyatımızın bütün sahələrindəki fəaliyyətindən ətraflı bəhs etmişdir.
Qeyd olunmuşdur ki, Heydər Əliyevin siyasi fəaliyyətinin əsas missiyası Azərbaycanı bəlalardan xilas etmək olub. Yalnız onun dərin zəkası Azərbaycanı bir dövlət kimi məhv olmaqdan xilas etdi. Bu gün Azərbaycan Respublikasının Prezidenti İlham Əliyev tərəfindən ulu öndərin siyasi kursu uğurla davam etdirilir. Bu uğurlu siyasət nəticəsində ölkəmiz regionun ən inkişaf etmiş dövlətinə çevrilmişdir.
Mərasimdə suveren Azərbaycan dövlətinin qurucusu və memarı, fenomen şəxsiyyət Heydər Əliyevin həyat və fəaliyyətindən geniş danışılmış, onun ideyalarının həyata keçirilməsi, respublikamızın iqtisadi qüdrətinin güclənməsi və daha da çiçəklənməsi naminə layiqli töhfələr verilməsinin hər bir kəsin vətəndaşlıq və mənəvi borcu olması xüsusilə vurğulanmışdır. Qeyd olunmuşdur ki, nə qədər ki, müstəqil Azərbaycan dövləti var, Azərbaycan xalqı var Heydər Əliyev ürəklərdə yaşayacaqdır.
Mərasim iştirakçıları ulu öndərin əziz xatirəsini bir dəqiqəlik sükutla yad etmiş, böyük ehtiramla onun ruhu qarşısında baş əymişlər.
tarix : 10.05.2012
|