“Ekol Mühəndislik Xidmətləri” QSC-nin fəaliyyətinin bütün dövrlərində insan faktoru, əməyin mühafizəsi və texniki təhlükəsizlik qaydalarına əməl olunması ən önəmli məsələlərdən biri olmuş və hazırda da bu işlər diqqət mərkəzindədir. Öz fəaliyyətini beynəlxalq standartlar səviyyəsində quran QSC işçilərin iş şəraitinin yaxşılaşdırılması, əməyin mühafizəsi və texniki təhlükəsizlik məsələlərini mövcud normativ-hüquqi aktlara və İSO-18001 (OHSAS) İdarəetmə Sistemlərinin tələblərinə uyğun olaraq həyata keçirir. Məhz bunun nəticəsidir ki, QSC-nin 6 illik fəaliyyəti dövründə istehsalatda heç bir bədbəxt hadisə və qəza halları baş verməmişdir.
Bu sahədə görülən tədbirlərin məntiqi davamı olaraq, QSC-də Əməyin Mühafizəsi Kabinetinin yaradılması da gündəmdə olan aktual məsələlərdən biri idi. Bununla əlaqədar, Azərbaycan Respublikasının qüvvədə olan qanunvericiliyinə, normativ-hüquqi aktlarına və İSO-18001 (OHSAS) İdarəetmə Sisteminin tələblərinə uyğun olaraq, QSC rəhbərliyinin və Həmkarlar Təşkilatının müvafiq qərarı ilə cari ilin II rübündə QSC-də müasir tipli Əməyin Mühafizəsi Kabineti yaradılmış və Əsasnaməsi təsdiq olunmuşdur. Əsasnaməyə görə Kabinet tədris məşğələsi kabineti ilə (texniki kabinet) birgə yaradılmış, “inzibati və məişət binaları”na uyğun olaraq təchiz edilmişdir. Kabinetin təşkili zamanı normativ-hüquqi tələblərlə yanaşı müasirliyin və əyaniliyin təmin olunmasına xüsusi diqqət yetirilmişdir.
İyunun 11-də QSC-də Əməyin Mühafizəsi Kabinetinin açılışı olmuşdir. Açılış mərasimində Azərbaycan Respublikası FHN-nin, Heydər Əliyev adına BNEZ-nun, “Azərneftyağ” NEZ-nun nümayəndələri və QSC-nin rəhbərliyi iştirask etrmişlər. Mərasimi giriş sözü ilə açan QSC-nin baş direktoru Ramil Əliyev ilk öncə tədbir iştirakçılarını salamlamış, Kabinetin açılışı münasibətilə onları təbrik etmiş və gələcək fəaliyyətlərində uğurlar arzulamışdır. Baş direktor Əməyin Mühafizəsi Kabinetinin yaranması zərurətindən və əhəmiyyətindən danışmış, əməyin mühafizəsi və texniki təhlükəsizlik məsələlərinin QSC-də daimi diqqət mərkəzində saxlanıldığını xüsusilə vurğulamışdır.
Mərasimdə digər çıxış edənlər Kabinetin beynəlxaılq standartlar səviyyəsaində təşkil olunduğunu qeyd edərək əmin olduqlarını bildirmişlər ki, Əməyin Mühafizəsi Kabineti QSC-nin bütün sahələrinə əhatə edilməklə, təsdiq olunmuş proqram əsasında yüksək səviyyədə fəaliyyət göstərəcəkdir. Natiqlər QSC-də əməyin mühafizəsi və texniki təhlükəsizlik qaydalarına beynəlxalq standartların tələblərinə uyğun əməl edilməsində, bu sahədə qarşıya qoyulmuş məqsədlərə nail olunmasında QSC-nin Texniki təhlükəsizlik şöbəsinə uğurlar diləmişlər.
tarix : 12.06.2012
|