Növbəti belə görüşlərdən biri də iyunun 12-də, QSC-nin baş ofisində İtaliyanın “MARCAB CONSULTİNG” şirkətinin nümayəndələri ilə olmuş və bu
şirkətin “Termo Dezorpsiya” qurğusunun prezentasiyası keçirilmişdir. Görüşdə
ARDNŞ-nin
və “Ekol Mühəndislik Xidmətləri” QSC-nin rəhbər işçiləri, mütəxəssisləri, həmçinin “MARCAB CONSULTİNG”, “Eco.Fiy” şirkətlərinin
və “SOLİDUS” MMC-nin nümayəndələri iştirak etmişlər.
Görüşü giriş sözü ilə açan QSC-nin baş direktoru Ramil Əliyev qonaqları salamlayaraq onları iştirakçılara təqdim etdi və görüşün məqsədi barədə qısa məlumat verdi. Sonra söz qonaqlara verildi.
“MARCAB CONSULTİNG” şirkətinin prezidenti Karlo Giomini səmimi qəbula görə QSC rəhbərliyinə öz təşəkkürünü bildirərək, rəhbərlik etdiyi şirkətin fəaliyyəti, texniki imkanları və xarici əlaqələri barədə görüş iştirakçılarını məlumatlandırdı. Sonra bu şirkətin istehsalı olan “Termo Dezorpsiya” qurğusunun prezentasiyası keçirildi. Prezentasiya zamanı neftlə çirklənmiş torpaqların termik üsulla təmizlənməsi qurğusunun məhsuldarlığı, iş prinsipi, texniki göstəriciləri, iqtisadi səmərəliliyi və digər göstəriciləri haqqında geniş məlumat verildi və animasiya filmi göstərildi.
Prezentasiyadan sonra görüş iştirakçıları qurğu ətrafında geniş müzakirələr apardılar və qarşılıqlı dialoq əsasında bir sıra məsələlərə aydınlıq gətirildi. Qeyd olundu ki, təmizlənəcək məhsuldan asılı olaraq qurğuda əlavə dəyişikliklər etməyə ehtiyac vardır. Odur ki, QSC-nin həyata keçirdiyi ekoloji layihə sahələrindən torpaq və şlam nümunələrinin götürülərək, aparılmış analizlərin nəticələrinə uyğun seçim etmək məqsədəuyğundur.
Görüşün sonunda qərara alındı ki, “MARCAB CONSULTİNG” şirkətinin nümayəndələri QSC-nin mütəxəssisləri ilə birlikdə layihə ərazilərindən nümunələr götürərək təhlil etdikdən sonra öz konkret təkliflərini versinlər.
Görüş hərtərəfli müzakirələr və qarşılıqlı anlaşma şəraitində başa çatmışdır.