"Ekol Mühəndislik Xidmətləri" QSC-nin fəaliyyətində əmək şəraitinin təhlükəsizlik normalarına uyğunlaşdırılması, istehsalat zədələnmələrinin qarşısının alınması və texniki-təhlükəsizlik qaydalarına riayət olunması əsas şərtlərdən biridir. Bununla əlaqədar olaraq, istehsalat sahələrində əməyin mühafizəsi, texniki-təhlükəsizliyin tələblərinə əməl olunması, istehsalat sanitariya normalarına uyğun olaraq işçilərin sanitar məişət otaqları, xüsusi geyim və fərdi mühafizə vasitələri ilə təmin edilmələri daimi diqqət mərkəzindədir.

Bu sahədə işçilərin bilik səviyyələrinin artırılması istiqamətində də xüsusi tədbirlər həyata keçirilir, dövrü olaraq təhlükəsizlik texnikası təlimatlarına uyğun işçilərin bilik səviyyələri yoxlanılır, əlavə təlimatlandırma və maarifləndirmə tədbirləri görülür.

İyunun 18-dən istehsalat sahələri üzrə QSC-də çalışan fəhlə və sürücülərin texniki təhlükəsizlik sahəsində biliklərinin yoxlanılması məqsədilə imtahanların keçirilməsinə başlanmışdır. Keçirilən imtahanların nəticələri fəhlə və sürücülərin texniki təhlükəsizlik qaydalarını, bu sahədə olan təlimatları və İSO–18001 (OHSAS) standartlarının tələblərini dərindən mənimsədiklərini bir daha təsdiq edir.

tarix : 20.06.2012