“Ekol Mühəndislik Xidmətləri” QSC-nin Ekoloji Monitorinq Departamentinin Milli Sertifikatlaşma Sistemində Akkreditasiyadan keçmiş Kompleks Tədqiqatlar Laboratoriyası (KTL) əvvəlki illərdə olduğu kimi, 2012-ci ilin birinci yarısında da ətraf mühitin vəziyyətinin tədqiq edilməsini və QSC-nin fəaliyyət sahələrində analitik nəzarət işlərini layiqincə yerinə yetirmişdir.

Cari ilin müvafiq dövründə QSC-nin istehsalat sahələrində istismarda olan dekantor və trikantor qurğularının səmərəliliyinin və optimal rejimdə işləməsinin müəyyən edilməsi məqsədilə, KTL tərəfindən mütəmadi olaraq qurğuların giriş və çıxışından götürülmüş nümunələr üzərində laborator təhlillər aparılmış və müvafiq təkliflər verilmişdir.

Hesabat dövründə QSC-nin “Sifarişçi” təşkilatlarından olan “Suraxanı Oyl Operation Kompany S.A” şirkətinin ərazisində formalaşan mədən sularından və neftlə çirklənmiş torpaqlardan, eləcə də “Azneft” İB-nin “Neft daşları”, “Abşeronneft”, “28 May” və N.Nərimanov adına neftqazçıxarma idarələrinin ərazilərində formalaşan axıntı sularından götürülmüş nümunələrin fiziki-kimyəvi və kimyəvi analizləri aparılmış, müvafiq hesabatlar hazırlanmışdır. Hazırda bu işlər davam etdirilir.

2012-ci ilin birinci yarısında KTL neftlə çirklənmiş torpaqların təmizlənməsi, neftşlam və qazma şlamının emalı sahəsində yeni üsulların axtarılması istiqamətində tədqiqatlarını davam etdirmiş, yerli və xarici şirkətlərin təqdim etdiyi müxtəlif bioloji və kimyəvi preparatlar üzərində sınaq təcrübələri keçirmişdir. Əldə olunmuş müsbət nəticələr istehsalata tətbiq olunmuşdur. Cari ilin may və iyun aylarında KTL-da Neft Kimya Prosesləri İnstitutunun (NKPİ) əməkdaşları ilə birgə sənaye-axıntı sularının emulsiyalanmış neft məhsullarından təmizlənməsi üçün müxtəlif reagentlərlə bir neçə qatılıqda laborator sınaq təhlilləri aparılmış və optimal qatılıqlar seçilmişdir. Bu istiqamətdə işlər davam etdirilir.

Cari ilin 6 ayı ərzində KTL-nın maddi texniki bazasının gücləndirilməsi istiqamətində də məqsədyönlü tədbirlər həyata keçirilmiş, Laboratoriya yeni cihaz və avadanlıqlarla təchiz edilmişdir. KTL-da çalışan işçilərin iş şəraitinin yaxşılaşdırılması məqsədilə, hazırda Laboratoriyada rekonstruksiya və təmir işləri yerinə yetirilir.

tarix : 20.07.2012