Azərbaycan Dövlət Neft Şirkətinin fəaliyyət sahələrində neftlə çirklənmiş torpaqların təmizlənməsi, neftşlamların və turşulu qudronların emalı sahəsində ARDNŞ-nin “Ekol Mühəndislik Xidmətləri” QSC qarşısında qoyduğu vəzifələrin layiqincə yerinə yetirilməsi istiqamətində məqsədyönlü tədbirlər həyata keçirilməkdədir. Bununla əlaqədar olaraq dünyanın inkişaf etmiş ölkələrində fəaliyyət göstərən analoji şirkətləri ilə əməkdaşlıq əlaqələri yaradılır və bu sahədə ən müasir texnika və texnologiyaların əldə olunması üçün səylər artırılır. Elə bu məqsədlə də, avqustun 23-də QSC-nin baş ofisində “Baufeld-Umvvelt-Engineerıng GmbH”, “Nelson Environmenta Remediation LTD” və “Geo Consultants “ LLC şirkətlərinin nümayəndələri ilə görüş keçirilmişdir
Görüşdə ARDNŞ-nin Ekoloji üzrə vitse-prezidentinin müşaviri Hikmət İslamov, ARDNŞ-nin Ekoloji Layihələrin İdarəedilməsi şöbəsinin rəis müavini Azər Mirzəyev, Ekologiya İdarəsinin baş mühəndisi Yaqub Ağasiyev , “Azneft” İB-nin Ekologiya şöbəsinin rəisi Rövşən Kərimov, “Ekol Mühəndislik Xidmətləri” QSC-nin Baş direktoru Ramil Əliyev, baş direktorun istehsalat üzrə müavini-Texniki direktor Məzahir Hüseynov, baş direktorun SƏTƏM üzrə müavini Rəşad İsmayılov, “Baufeld-Umvvelt-Engineerıng GmbH”, “Nelson Environmenta Remediation LTD” və “Geo Consultants “ LLC şirkətlərinin nümayəndələri, eləcə də əlaqədar departamentlərin, şöbələrin rəisləri və mütəxəssislər iştirak etmişlər.
QSC-nin baş direktoru Ramil Əliyev görüş iştirakçılarını salamlayaraq onlara görüşün məqsədi və əhəmiyyəti haqqında məlumat vermiş, qonaqları görüş iştirakçılarına təqdim etmişdir. O qeyd etmişdir ki, ötən gün “Baufeld-Umvvelt-Engineerıng GmbH”, “Nelson Environmenta Remediation LTD” və “Geo Consultants “ LLC şirkətlərinin nümayəndələri ARDNŞ-nin və QSC-nin istehsalat sahələrində çirklənmiş sahələrlə tanış olmuşlar. Bu görüşdə isə həmin şirkətlərin neftlə çirklənmiş torpaqların təmizlənməsi, neftşlamların və turşulu qudronun emalı qurğuları və texnologiyaları ilə tanış olub ətraflı müzakirələr aparacağıq.
Sonra “Baufeld-Umvvelt-Engineerıng GmbH” şirkətinin prezidenti Qrab Ditmar Cohan, “Nelson Environmenta Remediation LTD”-nin prezidenti Nelson Daril Riçard və “Geo Consultants “ LLC-nin mütəxəssisi Maris Bremss səmimi qəbula görə QSC rəhbərliyinə təşəkkürlərini bildirmiş, öz şirkətlərinin fəaliyyəti sahələri və texniki imkanları barədə görüş iştirakçılarına məlumat vermişlər. Qonaqlar çirklənmiş torpaqların təmizlənməsi, neftşlamların və turşulu qudronun emalı sahəsində şirkətlərinin istifadə etdikləri texnologiyalar və qurğular barədə əyani prezentasiyanı görüş iştirakçılarına təqdim etmişlər.
Maraqla qarşılanan prezentasiya ətrafında diskussiya xarakterli geniş müzakirələr aparılmış, bir çox texniki məsələlərə aydınlıq gətirilmişdir. Qərara alınmışdır ki, belə görüşlər davam etdirilməklə yanaşı, “Baufeld-Umvvelt-Engineerıng GmbH”, “Nelson Environmenta Remediation LTD” və “Geo Consultants “ LLC şirkətlərinin mütəxəssisləri Azərbaycanın neft sənaye sahələrində olan neftlə çirklənmiş torpaqların, neftşlamların turşulu qudronun xüsusiyyətlərini ətraflı öyrənmələrinə, ARDNŞ-nin və QSC-nin mütəxəssislərinin isə konkret təkliflər hazırlamasına zəruri ehtiyac vardır.
Sonda qeyd olunmuşdur ki, növbəti görüşlərdə hər iki istiqamətdə aparılmış araşdırmaların nəticələri geniş şəkildə müzakirə edilməli, əməkdaşlıq əlaqələrinin mümkün variantları nəzərdən keçirilməlidir.
tarix : 23.08.2012
|