Avqustun 29-da "Ekol Mühəndislik Xidmətləri" QSC-nin baş ofisində ABŞ-nın Ohio ştatında fəaliyyət göstərən FMT şirkətinin rəhbəri George Hay ilə görüş keçirilmişdir. Görüşdə ARDNŞ-nin Ekoloji Layihələrin İdarəedilməsi şöbəsinin rəis müavini Azər Mirzəyev, Ekologiya İdarəsinin mütəxəssisləri, “Azneft” İB-nin Ekologiya şöbəsinin rəisi Rövşən Kərimov, “Ekol Mühəndislik Xidmətləri” QSC-nin rəhbərliyi və mütəxəssisləri iştirak etmişlər.
Baş direktorun istehsalat üzrə müavini-Texniki direktor Məzahir Hüseynov iştirakçıları salamlayaraq bu görüşün neft sənaye sahələrində neftlə çirklənmiş torpaqların təmizlənməsi sahəsində ARDNŞ-nin “Ekol Mühəndislik Xidmətləri” QSC qarşısında qoyduğu vəzifələrin icrası ilə əlaqədar olduğunu diqqətə çatdırdı.Sonra söz FMT şirkətinin rəhbəri George Haya təqdim olundu.
George Hay rəhbərlik etdiyi şirkət haqqında görüş iştirakçılarına məlumat verərək bildirdi ki, bu şirkət uzun illərdir neftlə çirklənmiş torpaqların və daş kömür yataqlarından atılan tullantıların təmizlənməsi ilə məşğuldur. O qeyd etdi ki, bu tullantıların təmizlənməsində ABŞ-nın "TARMAC İNTERNATİONAL, İNC." şirkətinin istehsalı olan qurğudan istifadə olunur. Hazırda FMT şirkəti Ruminiyada, 15 hektar sahədə 220 min tona qədər neftlə çirklənmiş torpaqların termik üsulla təmizlənməsini həmin qurğu vasitəsilə uğurla həyata keçirmişdir.
Sonra George Hay "TARMAC İNTERNATİONAL, İNC." şirkətinin istehsalı olan qurğunun prezentasiyasını keçirmiş və qurğunun texniki göstəriciləri haqqında görüş iştirakçılarına məlumat vermişdir. Prezentasiya ətrafında geniş müzakirələr aparılmış, bir sıra texniki məsələlərə aydınlıq gətirilmişdir.
Görüşün sonunda qərara alınmışdır ki, QSC-nin layihə əraziləri, çirklənmiş torpaqların xarakteristikaları haqqında və eyni zamanda qurğu haqqında müfəssəl məlumatların əldə olunması üçün suallar toplusu hazırlansın və araşdırılsın.
tarix : 30.08.2012
|