Ekoloji  yönümlü fəaliyyət sahələri ilə məşğul olan "Ekol Mühəndislik Xidmətləri" QSC-nin neft emalı zavodlarının istehsalat sahələrində sənaye-çirkab sularının təmizlənməsi və neftşlamın emalı proseslərinin təkmilləşdirilməsi, eləcə də  ətraf mühitin mühafizəsi  istiqamətində davamlı  tədbirlər həyata keçirilir.

     Bu məqsədlə 2012-ci ildə də QSC-nin Tullantıların Emalı Departamentinin (TED) 6-cı (Heydər Əliyev adına BNEZ-nun 9-cu sexinin ərazisi) və 7-ci  ("Azərneftyağ" NEZ-nun 8-ci sexinin ərazisin) sahələrində mexaniki  təmizləyici qurğularda profilaktiki təmir işləri aparılmış, neftayrıcılarda uzun illər yığılıb qalmış  neftşlam təkrar emal olunmuşdur.

    Cari ildə  bu istiqamətdə  həyata keçirilən əhəmiyyətli tədbirlərdən biri də TED-nin 6-cı sahəsində mexaniki təmizləyici qurğular sisteminin 1-ci çökdürücü gölündə illərlə yığılıb qalmış 3.6 min tondan çox neftşlamın çıxarılaraq təkrar emal olunması və gölün çöküntülərdən təmizlənərək təkrara istismara verilməsidir. Bu işlərin yerinə yetirilməsi ilə sənaye-çirkab sularının  təmizlənmə  prosesi  xeyli dərəcədə yaxşılaşmışdır ki, bu da ərazidə ətraf mühitin  ekoloji vəziyyətinə öz müsbət təsirini göstərmişdir.

     Hazırda TED-nin 6-cı sahəsinin təmizləyici qurğular sisteminə daxil olan    6 ədəd  neftayrıcıların  çöküntülərdən təmizlənməsi işləri başa çatdırılmaq üzrədir. İcra müddətində təmizlənən qurğularda  5.6 min tondan çox neftşlam çıxarılaraq təkrar emala göndərilmiş və qurğular çöküntülərdən tam  təmizlənmişdir.

     Sənaye-çirkab sularının təmizlənməsi proseslərinin yaxşılaşdırılması  və ətraf mühitin mühafizəsi  istiqamətində tədbirləri  TED-nin 7-ci sahəsində də davam etdirilir.

tarix : 16.10.2012