Ötən illərdə "Ekol Mühəndislik Xidmətləri" QSC-nin həyata keçirdiyi prioritet ekoloji layihələrdən biri də H.Z.Tağıyev adına NQÇİ-nin mədən ərazisində (Qala sahəsində) neftlə çirklənmiş torpaqların təmizlənməsi və neftşlamın bioremediasiyası layihəsi olmuşdur. Layihə işləri 9 hektar sahəni əhatə etmiş, 4.5 hektar ərazidən 37 min m3-ə qədər neftşlam çıxarılaraq xüsusi ayrılmış sahədə bioremediasiya olunmuş və ərazidə mexaniki rekultivasiya işləri yerinə yetirilmişdir.

2010-cu ildən başlayaraq, layihənin son mərhələsində reabilitasiya olunmuş ərazilərdə QSC tərəfindən 10 mindən çox müxtəlif ağac növləri və bəzək kolları əkilmişdir. Hazırda QSC-nin Torpaqların rekultivasiyası departamenti H.Z.Tağıyev adına NQÇİ-nin Qala sahəsində 11 min 500-dən çox müxtəlif ağac növlərinə və bəzək kollarına aqrotexniki xidmətlər göstərir. Əvvələr bataqlığı xatırladan bu sahə indi yaşıllığa bürünmüş, görülən tədbirlər nəticəsində əkilmiş ağaclar kifayət qədər inkişaf etmişdir.

Payız mövsümünün başlaması ilə əlaqədar layihə ərazisində mövsümü işlərə start verilmişdir. Hazırda ərazidə ağac və kolların budanması, bitkilərə mövsümü gübrələrin verilməsi, abadlıq işlərinin aparılması və digər aqrotexniki tədbirlər yüksək ahənglə davam etdirilir. Bu mövsümdə də ərazidə yeni ağac və kolların əkilməsi nəzərdə tutulmuşdur.

tarix : 01.11.2012