Noyabrın 12-də “Ekol Mühəndislik Xidmətləri” QSC-nin baş ofisində Almaniyanın “AWAS” firmasının nümayəndələri ilə növbəti görüş keçirilmişdir. Görüş “AWAS” firmasının istehsal etdiyi su təmizləyici qurğuları ilə tanış olmaq məqsədi ilə təşkil olunmuşdur. Görüşdə "AWAS" firmasının sahibi Xaints İnne, satış üzrə direktor Vadim Loboyka, firmanın Azərbaycan nümayəndəsi Fuad Həmidov, QSC-nin baş direktorunun istehsalat üzrə müavini-Texniki direktor Məzahir Hüseynov, baş direktorun SƏTƏM üzrə müavini Rəşad İsmayılov, aidiyyatı departament və şöbə rəisləri iştirak emişlər.
Məzahir Hüseynov qonaqları salamlayaraq görüşün məqsədi barədə məlumat vermiş və qonaqlara bu ilin aprel ayında keçirilmiş görüşü xatırlatmışdır. O bildirmişdir ki, bu görüş nanotexnologiyaların istehsalata tətbiqi sahəsində QSC-nin həyata keçirdiyi tədbirlərin məntiqi davamıdır. Xaints İnne səmimi qəbula görə minnətdarlığını bildirdi və QSC nümayəndələri ilə ikinci dəfə görüşdüyündən məmnun olduğunu qeyd etmişdir. Sonra firmanın satış üzrə direktoru Vadim Loboyka istehsal etdikləri, müxtəlif modelli qurğuların elektron məlumatlarını və video çarxlarını görüş iştirakçılarına təqdim etmiş və qurğuların iş prinsipi, onların texniki göstəriciləri barədə ətraflı şərh vermişdir. Prezentasiyadan sonra görüş iştirakçıları mövzu ətrafında geniş müzakirələr aparmışlar. Təklif olunan qurğuların Azərbaycan şəraitində istifadə olunmasının mümkün variantları, texniki şərtləri və iqtisadi səmərəliliyi məsələlərinə aydınlıq gətirilmişdir. Sonda qərara alınmışdır ki, hazırda QSC-nin təmizlədiyi çirkab-sənaye sularından nümunələr “AWAS” firmasına təqdim olunsun və nəticələrə uyğun olaraq müzakirələr davam etdirilsin. Eləcə də, QSC mütəxəssislərinin hazırda digər dövlətlərdə istismarda olan qurğuları ilə yerindəcə tanış olsunlar.
tarix : 13.11.2012
|