Noyabrın 15-də QSC-nin baş ofisində YAP-nın 20-ci ildönümü və Milli Dirçəliş Günü ilə əlaqədar geniş tədbir keçirilmişdir. Tədbirdə YAP "Ekol" ilk ərazi təşkilatının üzvləri və Nizami rayon təşkilatı Aparatının rəhbəri Ramil Vəlibəyov iştirak etmişlər.
Tədbirdə çıxış edənlər baş direktorun müavini Rəşad İsmayılov, YAP Nizami rayon təşkilatı Aparatının rəhbəri Ramil Vəlibəyov, baş direktorun məsləhətçisi Kamil Akimov, YAP "Ekol" ilk ərazi təşkilatının sədri Fəxrəddin Quliyev və digərləri tədbir iştirakçılarını bu əlamətdar tarixi günlər münasibətilə təbrik etmişlər. Sonra, natiqlər Yeni Azərbaycan Partiyasının keçdiyi şərəfli tarixi yola nəzər salmış, onun Müstəqil Azərbaycan Respublikasının ictimai-siyasi həyatındakı misilsiz rolundan və hazırkı xidmətlərindən yüksək ruh yüksəkliyi ilə danışmışlar. Natiqlər qeyd etmişlər ki, 20 il bundan öncə Azərbaycanda yaranmış ağır tarixi şərait yeni bir siyasi təşkilatın yaranma zərurətini meydana gətirmişdir. Məhz bu səbəbdən 1992-ci il noyabrin 21-də, Naxçıvan Muxtar Respublikasında, Heydər Əliyevin sədrliyi ilə keçirilən konfransda Yeni Azərbaycan Partiyası təsis olunmuşdur. YAP yarandığı gündən üzərinə düşən funksiyaları uğurla həyata keçirməklə, insanları vahid ideologiya və siyasi hakimiyyət ətrafında toplamağa nail oldu. Bu gün dünyanın ən iri siyasi partiya təşkilatlarının üzvü olan və müxtəlif güclü dövlətlərin hakim siyasi partiyaları ilə əməkdaşlıq edən YAP, Azərbaycanın partologiya tarixinə fenomenal siyasi qurum kimi daxil olmuşdur. Yaranmasından cəmi 6 ay sonra hakimiyyətə gəlmiş, həmçinin , keçirilmiş bütün seçkilərdə möhtəşəm qələbələr qazanmış, 600 min üzvü olan Yeni Azərbaycan Partiyası Azərbaycan əhalisinin böyük əksəriyyətinin dəstəyini alan siyasi təşkilata çevrilib. Toplantıda çıxış edən natiqlər xalqımızın qürur mənbəyi olan Milli Dirçəliş Gününə də öz fikirlərini bildirdilər və o tarixi dövrə bir daha diqqət çəkdilər. Qeyd olundu ki, 1988-ci ilin ilk günlərində ermənistanın Azərbaycana qarşı açıq təcavüzü başlandı. Moskvanın, xüsusən də SSRİ-nin rəhbəri M.Qarbaçovun buna biganə münasibətini görən ermənilər daha da azqınlaşaraq xalqımıza qarşı daha ağır cinayətlər törətməyə başladılar. Elə həmin ilin fevral ayından Azərbaycanın Dağlıq Qarabağ bölgəsində ixtişaşlar törətdilər. Onlar Azərbaycanın əzəli tarixi torpağı olan Dağlıq Qarabağı Azərbaycandan qoparıb Ermənistana birləşdirmək haqqında məsələ qaldırdılar. Ancaq bu məsələ barədə nə Moskva , nə də Azərbaycanın o vaxtki rəhbərliyi heç bir qəti tədbir görmək istəmədilər. 1988-ci ilin noyabrın 17-də Bakının əsas meydanı sayılan Azadlıq Meydanında Sovet dövlətinin xalqımıza qarşı apardığı antiazərbaycan siyasətinə etiraz əlaməti olaraq, Azərbaycan ictimaiyyətinin sonu bilinməyən mitinqi başlandı. Bu, əsl xalq hərəkatı, milli azadlıq hərəkatı idi. Azərbaycanda bu hadisələr milli azadlıq hərəkatı kimi qiymətləndirilir və Vətənimizin istiqlaliyyət qazanmasında əsas amil sayılır. 1992-ci ildən isə 17 noyabr Milli Dirçəliş Günü kimi qeyd olunur. Sonda natiqlər bir daha əlamətdar tarixi günlər münasibətilə tədbir iştirakçılarını təbrik etmiş, onları Heydər Əliyev ideyalarının əzmlə həyata keçirilməsi, dövlətçiliyimizin qorunması və inkişaf etdirilməsi yolunda Yeni Azərbaycan Partiyasının ətrafında daha da sıx birləşməyə çağırmışlar. Tədbirdə bir neçə nəfər partiya fəalına YAP Nizami rayon təşkilatının Fəxri Fərmanı təqdim olunmuşdur.
tarix : 15.11.2012
|