Noyabrın 28-də QSC-nin baş ofisində İtaliyanın Foster Wheeler şirkətinin nümayəndələri ilə görüş keçirilmişdir. Tanışlıq xarakteri daşıyan görüşdə Foster Wheeler şirkətinin Ekoloji Departamentinin kommersiya əməliyyatları üzrə Meneceri Stefano Donzeli, şirkətin Azərbaycan nümayəndəsi Fərhad Qasımov, eləcə də QSC-nin baş direktoru Ramil Əliyev, baş direktorun müavinləri Məzahir Hüseynov, Rəşad İsmayılov və aidiyyəti departament, şöbə rəisləri iştirak etmişlər.

QSC-nin baş direktoru Ramil Əliyev qonaqları səmimi salamlayaraq ARDNŞ-nin "Ekol Mühəndislik Xidmətləri" QSC qarşısında qoyduğu vəzifələrin icrası ilə əlaqədar, yeni texnologiyaların əldə olunması məqsədilə dünyanın tanınmış şirkətləri ilə mütəmadi görüşlərin keçirildiyini onların diqqətinə çatdırdı. Baş direktor bu görüşün də əhəmiyyətli olacağına əminliyini bildirdi.
Foster Wheeler şirkətinin Meneceri Stefano Donzeli səmimi qəbula və istehsalat sahələri ilə tanışlıq üçün yaradılan əlverişli şəraitə görə QSC rəhbərliyinə öz minnətdarlığını bildirdi və təmsil etdiyi şirkət haqqında məlumat verdi. O, Foster Wheeler şirkətinin neftşlamın emalında, çirkab suların və neftlə çirklənmiş torpaqların təmizlənməsində istifadə etdiyi texnika və texnologiyaların, həmçinin həyata keçirdikləri layihələrin geniş prezentasiyasını görüş iştirakçılarına təqdim etdi. Sonra böyük maraqla qarşılanan prezentasiya ətrafında geniş müzakirələr aparıldı.
Görüşün sonunda qərara alındı ki, bu kimi görüşlər davamlı olmalı, Foster Wheeler şirkətinin təqdim etdiyi texnologiyalar, eləcə də QSC-nin istehsalat sahələrindəki sənaye-çirkab sularının, neftşlamın və çirklənmiş torpaqların xüsusiyyətləri hərtərəfli öyrənilməlidir. Gələcək əməkdaşlıq əlaqələrinin mümkünlüyü isə yalnız "Ekol Mühəndislik Xidmətləri" QSC-nin təsisçisi olduğu ARDNŞ-nin ekoloji problemlərin həllinə yönəldilmiş layihələrdə şirkətlərin iştirakından asılıdır.

tarix : 29.11.2012