2012-ci ildə Ekoloji Monitorinq Departamenti (EMD) “Ekol Mühəndislik Xidmətləri” QSC-nin ekoloji siyasətinin həyata keçirilməsi, müqavilə əsasında "Sifarişçi" təşkilatların istehsalat sahələrində keyfiyyətli monitorinq işlərinin aparılması, ekoloji texniki normativ sənədlərin işlənib hazırlanması və analitik tədqiqat işlərinin yerinə yetirilməsi sahəsində böyük uğurlara imza atmışdır.

Ötən il EMD "Azneft" İB-nin "28 May", "Neft daşları", "Abşeronneft" və N. Nərimanov adına NQÇİ-nin mədən ərazilərində və "Kompleks Qazma İşləri" Trestinin "Abşeron" Qİİ-nin, "Tamponaj İdarəsi"-nin, "Qazmaservis və Loqistika" İdarəsinin və ARDNŞ-nin Qaz Emalı Zavodunun istehsalat sahələrində təqvim planına uyğun olaraq ekoloji monitorinq işlərini keyfiyyətlə yerinə yetirmişdir. Monitorinq rayonlarından su, qrunt və şlam götürülərək departamentin Kompleks Tədqiqatlar Laboratoriyasına təqdim olunmuş və analitik təhlillərin nəticələrindən asılı olaraq, axarların və çirklənmiş ərazilərin fiziki–kimyəvi təsirinin təhlükəlilik dərəcəsinin dinamikası öyrənilmiş, baş verən təsir dəyişiklikləri nəzarətdə saxlanılmışdır. Aparılmış monitorinq işlərinin nəticələrinə uyğun olaraq müvafiq qaydada hesabatlar hazırlanaraq "Sifarişçi" təşkilatlara təqdim olunmuşdur.
2012-ci ildə EMD-nin Normativ-texniki sənədlərlə iş şöbəsi ARDNŞ-nin tabeçiliyində olan təşkilatlar və qeyri neft sektorunda fəaliyyət göstərən özəl və dövlət müəssisələri üçün müxtəlif ekoloji normativ-texniki sənədlərin yüksək səviyyədə işlənib hazırlanması və müvafiq təşkilatlarla razılaşdırıldıqdan sonra sifarişçilərə təhvil verilməsi, bununla da "Sifarişçi" məmnunluğunun qazanılması istiqamətində məqsədyönlü tədbirlər həyata keçirmişdir.
Normativ-texniki sənədlərlə iş şöbəsi ötən il "Azneft" İB-nin "Maddi-Texniki Təchizat İdarəsi"nin,"Tamponaj və Layların Neftveriminin Artırılması İdarəsi"nin, "Qobustan Nəqliyyat İdarəsi"nin, "Neft Daşları", "28 May" və "Siyəzənneft" NQÇİ-nin, "Bahar Enerji Əməliyyat Şirkəti"nin ,"AzGerneft" MMC-nin və "Surakhanı Oyl Operation Company S.A." Şirkətinin ekoloji normativ-texniki sənədlərinin hazırlanması işlərini uğurla yerinə yetirmişdir. Bu sənədlərin işlənib hazırlanması mövcud qanunvericilik, standartlar, rəhbər və normativ-hüquqi sənədlər, metodiki göstərişlər və tövsiyələr nəzərə alınmaqla, müəssisənin istehsal xarakterindən, yerləşmə mövqeyindən asılı olaraq xüsusi tərtibatla və plana uyğun şəkildə təşkil olunmuşdur.
EMD-nin Kompleks Tədqiqatlar Laboratoriyası (KTL) da əvvəlki illərdə olduğu kimi, ötən il ətraf mühitin vəziyyətinin tədqiq edilməsini və analitik nəzarət işlərini günün tələbləri səviyyəsində qurmuşdur. İl ərzində QSC-nin istehsalat sahələrində istismar olunan təmizləyici qurğuların optimal rejimdə işləməsini təmin etmək məqsədilə, KTL tərəfindən qurğuların giriş və çıxışından 172 nümunə götürülmüş, nümunələr üzərində 543 analitik təhlillər aparılmış və müvafiq təkliflər verilmişdir.
Ötən müddətdə EMD-nin "Sifarişçi" təşkilatların istehsalat sahələrində keçirdiyi monitorinqlər zamanı 173 müxtəlif nöqtədən götürülmüş 1900 nümunə üzərində KTL tərəfindən 7014 fiziki-kimyəvi və kimyəvi təhlillər aparılmış və müvafiq hesabatlar hazırlanaraq sifarişçilərə təqdim edilmişdir.
2012-ci ildə KTL neftlə çirklənmiş torpaqların təmizlənməsi, neftşlam və qazma şlamının emalı sahəsində yeni üsulların axtarılması istiqamətində tədqiqatlarını davam etdirmiş, yerli və xarici şirkətlərin təqdim etdiyi müxtəlif bioloji və kimyəvi preparatlar üzərində sınaq təcrübələri keçirmişdir.

tarix : 23.01.2013