|
XX əsr Azərbaycan tarixinin ən dəhşətli faciəsi, həm də dinc əhaliyə, bütün insanlığa qarşı törədilən, xarakterinə və miqyasına görə ən dəhşətli ümumbəşəri bir faciə olan Xocalı soyqırımından 21 il ötür. Bu münasibətlə respublikamızın hər yerində, eləcə də xarici diaspor təşkilatlarında geniş miqyaslı tədbirlər keçirilir.
Fevralın 26-da faciənin 21-ci ildönümü ilə əlaqədar QSC-nin istehsalat sahələrində də tədbirlər keçirilmişdir. Tədbirlərdə Xocalı faciəsini əks etdirən video çarxlar nümayiş olunmuş, istehsalat sahələrində isə stendlər quraşdırılmışdır.
Tədbir iştirakçıları öz çıxışlarında qeyd etdilər ki, xüsusi qəddarlıqla törədilmiş Xocalı soyqırımı, erməni şovinist-millətçilərinin azərbaycanlılara qarşı iki əsrdən artıq müddətdə həyata keçirdiyi etnik təmizləmə siyasətinin davamı, tarixin qara səhifəsidir. Amansız qətllərlə dünya tarixində silinməz izlər buraxan Xocalı soyqırımı, əslində erməni təcavüzkarlarının yalnız Azərbaycan xalqına deyil, insanlığa qarşı ən ağır cinayəti, bəşəriyyətə yönəldilmiş qəddarlıq təcəssümü idi.
Bütün bunlara baxmayaraq hadisələr göstərir ki, bu gün erməni millətçiləri hələ də özlərinin bədnam və çirkin niyyətlərindən əl çəkməyiblər. Mənfur düşmən cinayət əməllərini ört-basdır etmək məqsədilə müxtəlif vasitələrlə tarixi saxtalaşdırmağa əl atır, onu öz xeyirlərinə yazmağa cəhd göstərirlər. Təəssüflər olsun ki, insan hüquqlarının kütləvi və kobud şəkildə pozulması ilə nəticələnən Xocalı soyqırımına hələ də beynəlxalq miqyasda hüquqi qiymət verilməmişdir.
Çıxış edənlər bildirdilər ki, ağlasığmaz qəddarlıqla dinc insanları kütləvi qırğına məruz qoyan erməni millətçiləri öz çirkin əməllərini ört basdır etməyə çalışsalar da, ümumbəşəri dəyərlərlə, beynəlxalq hüquqi normalara əsaslanaraq düşünməyin və qərar qəbul etməyin zamanı çatmışdır. Nüfuzlu beynəlxalq təşkilatlar Azərbaycanın haqlı mövqeyini dəstəkləməli, işğalçı Ermənistan dövlətinə qarşı sərt sanksiyalar qəbul edilməlidir. Azərbaycan xalqının və ümumən insanlığın əleyhinə yönəldilmiş bu son dərəcə ağır hərbi cinayət beynəlxalq miqyasda öz hüquqi-siyasi qiymətini almalıdır.
Tədbir iştirakçıları əminliklə qeyd etmişlər ki, Azərbaycan dövlətinin uğurlu xarici siyasəti nəticəsində artıq erməni yalanları ifşa olunur, ermənilərin iç üzü dünyaya açılır. Gün gələcək ki, Xocalı soyqırımını törədən erməni cinayətkarları məhkəmə qarşısında cavab verəcəklər. Azərbaycanın işğal altında olan torpaqları azad olunacaq və soydaşlarımız öz doğma yurd-yuvalarına qayıdacaqlar.
Tədbirlərin sonunda Xocalı faciəsi qurbanlarının ruhu bir dəqiqəlik sükutla yad edilmişdir.
tarix : 26.02.2013
|
ana səhifə
Satınalma
əlaqə
Futzal
Alternativ Enerji
Bu maraqlıdır
