05 mart 2013-cü il tarixdə "Ekol Mühəndislik Xidmətləri" QSC-nin baş ofisində Türkiyənin Nano Tech Texnology Concept LTD şirkətinin nümayəndələri ilə görüş keçirilmişdir. Görüşdə "Azneft" İB-nin baş direktorunun ekologiya üzrə müavini Faiq Cəfərov, QSC-nin baş direktoru Ramil Əliyev, baş direktorun müavinləri, Məzahir Hüseynov, Rəşad İsmayılov, ARDNŞ-nin Ekologiya İdarəsinin, eləcə də QSC-nin əlaqədar departament və şöbə rəisləri, həmçinin Nano Tech Texnology Concept LTD şirkətinin nümayəndələri Ayhan Doyuk, Filiz Nabiyeva, Fazil Eyubler və Mehmet Gungör iştirak etmişlər.

Ayhan Doyuk öncə səmimi qəbula görə QSC rəhbərliyinə təmsil etdiyi şirkətin nümayəndələri adından dərin təşəkkürünü bildirdi. Sonra o sənaye-axıntı sularının və neftşlamın neftdən, sudan və mexaniki qarışıqlardan kimyəvi üsullarla təmizlənməsi texnologiyalarının prezentasiyasını görüş iştirakçılarına təqdim etdi. Görüşdə A.Doyuk təmizlənmə prosesində istifadə olunan qurğunun texniki xarakteristikaları və texnoloji proseslərdə istifadə olunan kimyəvi reagentlər haqqında geniş məlumat verdi. Daha sonra O, bundan əvvəl "Ekol Mühəndislik Xidmətləri" QSC-nin istehsalat sahələrindən götürülmüş, sənaye-çirkab suları və neftşlam nümunələrinin laboratoriya şəraitində nanotexnologiyalarla təmizlənmiş nümunələrini iştirakçılara nümayiş etdirdi.

 Sonra mövzu ətrafında geniş müzakirələr aparıldı. Ayhan Doyuk ona ünvanlanmış müxtəlif suallara dolğun cavab verdi. Lay sularının norma həddinə qədər təmizlənməsinin mümkün variantları barədə Faiq Cəfərovun ona ünvanlandığı sualla əlaqədar A.Doyuk bunun araşdırmaya ehtiyac olduğunu diqqətə çatdırdı.

Sonda QSC-nin baş direktoru Ramil Əliyev maraqlı təklifə və məlumatlara görə türkiyəli qonaqlara öz təşəkkürünü bildirdi. Və qərara alındı ki, Nano Tech Texnology Concept LTD şirkətinin nümayəndələri QSC-nin istehsalat sahələri ilə tanış olsunlar və gələcək tədqiqatlar üçün sənaye-çirkab sularından, eləcə də neftşlamdan zəruri nümunələr götürülsün. Aparılan tədqiqatların nəticəsi əsasında konkret təkliflər hazırlanaraq yenidən müzakirəyə çıxarılsın. Bununla da görüş qarşılıqlı anlaşma şəraitində başa çatmışdır.

 

tarix : 06.03.2013