|
Sovetlər dövründən miras qalan və Abşeron yarımadasının, eləcə də Bakının ən başlıca problemlərindən biri, torpaqların neftlə çirklənməsi, zavod və fabriklərin şəhərin mərkəzinə yaxın yerləşməsi idi ki, bu da paytaxtın ekoloji vəziyyətinin acınacaqlı hala düşməsinə səbəb olmuşdu. Elə bu səbəbdən də Azərbaycan Respublikası Prezidentinin Sərəncamı ilə təsdiq olunmuş “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı” çərçivəsində köhnəlmiş sənaye obyektlərinin şəhərin hüdudlarından kənara çıxarılması və çirklənmiş torpaqların təmizlənməsi işləri geniş vüsət almışdır. Bu tarixi sənədlə əlaqədar olaraq, Bakı Şəhər İcra Hakimiyyətinin müvafiq sərəncamı ilə, “Qara şəhər”in bərpa olunması və "Ağ Şəhər" layihəsinin həyata keçirilməsi haqqında qərar qəbul edilmişdir.
Paytaxtımız üçün müstəsna əhəmiyyət kəsb edən və bu layihənin ilkin mərhələsində yaxından iştirak edən "Ekol Mühəndislik Xidmətləri" QSC-nin operativ fəaliyyəti nəticəsində, binaların inşa olunacağı Yaşıl Ada rayonunda neft məhsulları ilə çirklənmiş torpaqların təmizlənməsi prosesi davam etdirilir. Qeyd edək ki, layihənin icra müddətində QSC tərəfindən bu ərazidən 1 milyon 500 min m3-dən çox neft məhsulları ilə çirklənmiş torpaq daşınmışdır. Həmçinin, layihə ərazisində NEZ-nun keçmiş istehsalat sahələrində uzun illərdən qalmış çoxlu sayda neft məhsulları ilə çirklənmiş süni gölməçələr mövcuddur ki, bu gölməçələrdən suların nəqli və təmizlənməsi də "Ekol Mühəndislik Xidmətləri" QSC-nə həvalə edilmişdir.
Bununla əlaqədar, ötən ay QSC-nin Tullantıların Emalı Departamenti (TED) Heydər Əliyev adına BNEZ-nun Bakı Ağ Şəhər layihəsi ərazisində yerləşən, köhnə çənlər parkı sahəsindəki gölməçədən 30 min m3-ə qədər sənaye çirkab sularının "Sifarişçi"nin boru xətti vasitəsilə təyin edilmiş yerə nəql olunması işlərinə başlamışdır.
Mart ayından isə, TED müasir güclü nasoslardan istifadə etməklə Yaşıl Ada rayonu ərazisində olan "Azərneftyağ" NEZ-nun köhnə çənlər parkı sahəsindəki gölməçənin suyunun nəqlinə başlamışdır. Bu məqsədlə ərazidə zəruri hazırlıq işləri görülmüş və əlavə boru xətti çəkilmişdir.
"Ekol Mühəndislik Xidmətləri" QSC Bakı Ağ Şəhər layihəsi üzrə üzərinə düşən vəzifə öhdəliklərinin layiqincə yerinə yetirilməsi məqsədilə ardıcıl tədbirlər həyata keçirir.
tarix : 11.03.2013
|
ana səhifə
Satınalma
əlaqə
Futzal
Alternativ Enerji
Bu maraqlıdır
