Azərbaycan Respublikası Prezidenti cənab İlham Əliyevin Sərəncamı ilə əlaqədar olaraq Bakı şəhərinin ekoloji vəziyyətinin yaxşılaşdırılması, köhnəlmiş sənaye obyektlərinin şəhər hüdudlarından kənara çıxarılması və çirklənmiş torpaqların təmizlənməsi sahəsində genişmiqyaslı layihələrin həyata keçirilməsi davam etdirilir. Bu tarixi Sərəncamla əlaqədar olaraq Xətai rayonu “Qara Şəhər” ərazisində də ekoloji yönümlü layihənin icrası geniş vüsət almışdır. Bu ərazidə yeni müasir mərkəzin yaradılması və bundan sonra "Bakı Ağ Şəhər" adlandırılması nəzərdə tutulmuşdur.
2010-cu ilin fevral ayından layihənin iştirakçısı olan “Ekol Mühəndislik Xidmətləri” QSC ötən müddətdə layihənin “Yaşıl ada” ərazisinin köhnəlmiş neft sənaye obyektlərindən neftşlamın çıxarılması, anbarlaşdırılması və ərazidəki neftlə çirklənmiş torpaqların təmizlənməsi sahəsində əhəmiyyətli işlər yerinə yetirmişdir.QSC-nin Tullantıların Emalı Departamenti və Torpaqların Rekultivasiyası Departamenti tərəfindən layihə ərazisinin ayrı-ayrı sahələrindən neft məhsulları ilə çirklənmiş torpaqların daşınması və süni gölməçələrdəki sənaye-çirkab suların nəqli davam etdirilir.
Bununla yanaşı, QSC-nin müvafiq departamentləri layihə ərazisinə daxil olan "Azərneftyağ" NEZ-nun köhnə təmizləyici qurğular sisteminin ləğvi ilə əlaqədar zəruri işləri də həyata keçirir. Sahənin ləğvi ilə əlaqədar mexaniki qurğulara daxil olan su və digər kommunikasiya xətləri kəsilmiş, tutumlarda olan sənaye-çirkab suları "Azərneftyağ" NEZ fəaliyyətdə olan təmizləyici qurğular sisteminə nəql olunmuşdur.
Hazırda ləğv olunacaq tutumlarda təmizləmə işləri aparılır.
tarix : 23.05.2013
|