5 iyun -"Ümumdünya Ətraf Mühit Günü" -nün qeyd olunmasına, 11may 1971-ci ildə dünyanın 23 ölkəsinin 2 200 elm və mədəniyyət xadiminin imzası ilə BMT-nin Baş katibinə ünvanlanmış müraciət səbəb olmuşdur. Bu müraciətlə onlar bəşəriyyətə ətraf mühitin çirklənməsi barədə xəbərdarlıq vermişlər. Bununla əlaqədar olaraq 16 dekabr 1972-ci ildə BMT-nin Baş Assambleyasının 27-ci sessiyasında bu günün qeyd olunması elan edilmişdir. Həmçinin, bu sessiyada BMT sistemində yeni təşkilat - BMT Ətraf Mühit Proqramı ( UNEP) yaradılmışdır. Hər il bu təşkilat tərəfindən 5 iyun -"Ümumdünya Ətraf Mühit Günü" keçirilir. Ölkəmizdə də hər il 5 iyun tarixdə əlaqədar təşkilatlar tərəfindən -"Ümumdünya Ətraf Mühit Günü" qeyd olunur və əhalinin diqqəti bir daha ekoloji problemlərə cəlb edilir.

Ekoloji yönümlü xidmətlər göstərən "Ekol Mühəndislik Xidmətləri" QSC də, hər il olduğu kimi 2013-cü ildə də 5 iyun -"Ümumdünya Ətraf Mühit Günü"-nü bir sıra tədbirlərlə qeyd etmişdir. Əlamətdar gün münasibətilə keçirilən tədbirdə QSC-nin Baş direktoru Ramil Əliyev "Ümumdünya Ətraf Mühit Günü"-nün yaranma tarixi və əhəmiyyəti", QSC-nin Ekoloji Monitorinq Departamentinin (EMD) rəisi Şahabiddin Albuşov "Ekol Mühəndislik Xidmətləri" QSC-nin ətraf mühitin mühafizəsi sahəsindəki rolu", EMD-nin Səyyar monitorinq xidmətinin rəisi Maqsud Babayev "Azərbaycan Respublikasında ətraf mühitin mühafizəsi sahəsində görülən işlər", EMD-nin rəis müavini Natella Şəfiyeva isə "Ətraf mühitin mühafizəsinə vətəndaş münasibəti" mövzularında ətraflı məruzələr etmişlər. Sonra ətraf mühitin mühafizəsi ilə əlaqədar video çarxlar nümayiş etdirilmişdir. Toplantıda QSC-nin 5 nəfər əməkdaşı isə ətraf mühitin mühafizəsi sahəsindəki səmərəli fəaliyyətinə görə Fəxri Fərmanla təltif olunmuşlar.