Son illərdə ARDNŞ-nin neft sənayesi sahələrində ekoloji vəziyyətin yaxşılaşdırılmasına dair tədbirlər planı çərçivəsində H.Z.Tağıyev adına NQÇİ-nin mədən ərazilərində də önəmli ekoloji layihələr həyata keçirilir. Bu layihələrin icra olunmasında isə əsas "Podratçı" qismində "Ekol Mühəndislik Xidmətləri" QSC iştirak edir.
2010-cu ildən başlayaraq QSC-nin Torpaqların rekultivasiyası departamenti H.Z. Tağıyev adına NQÇİ-nin 2-ci mədən ərazisində 10 hektara qədər sahədə neftlə çirklənmiş torpaqların təmizlənməsi layihəsini uğurla başa vurmuş, həmin sahədə 11 300 ədəddən çox müxtəlif növ ağac və bəzək kolları əkilərək aqrotexniki xidmətlər göstərilmişdir. 2011-2012-ci illərdə isə NQÇİ-nin 4-cü mədən ərazisində neftlə çirklənmiş torpaqların rekultivasiyası işləri yerinə yetirilmişdir. Hazırda H.Z.Tağıyev adına NQÇİ-nin fəaliyyət sahələrində ekoloji vəziyyətin yaxşılaşdırılması istiqamətində tədbirlər davam etdirilir.
2013-cü ildə QSC NQÇİ-nin 1-ci mədən ərazisində (Qala sahəsi) yaşıllıqların salınması və bitkilərə aqrotexniki xidmətlərin göstərilməsi layihəsinin icrasına başlamışdır. Cari ilin yaz mövsümündə Torpaqların rekultivasiyası departamentinin (TRD) 1-ci sahəsinin kollektivi tərəfindən NQÇİ-nin 1-ci mədən ərazisində (Elektrosex) 3 mindən çox, İdarənin inzibati binasının ərazisində isə 2 minə qədər müxtəlif ağac növləri əkilmişdir. Hazırda TRD bu ərazidə əkinə qədər olan ağaclar da daxil olmaqla 6 minə qədər müxtəlif ağac növlərinə aqrotexniki xidmətlər göstərir. Bitkilərin normal inkişafı üçün bütün aqrotexniki qaydalara ciddi əməl etməklə yanaşı, su təchizatının yaxşılaşdırılması üçün ərazi mexaniki suvarma (damcı üsulu ilə) sistemi ilə təmin olunmuş və zəruri tədbirlər görülmüşdür.
"Ekol Mühəndislik Xidmətləri" QSC H.Z. Tağıyev adına NQÇİ-nin fəaliyyət sahələrində ekoloji vəziyyətin yaxşılaşdırılması layihələrinin icrasını uğurla davam etdirir.
tarix : 16.08.2013
|