"Ekol Mühəndislik Xidmətləri" QSC-də "Kollektiv əmək müqaviləsi"nin şərtlərinə uyğun olaraq işçilərin yay istirahətlərinin səmərəli təşkili istiqamətdə məqsədyönlü tədbirlər həyata keçirilir. Hər il işçilərin yay istirahəti respublikamızın müxtəlif dilbər guşələrində yerləşən istirahət mərkəzlərində təşkil olunur.
2013-cü ildə də işçilərin yay istirahətlərinin səmərəli təşkil olunması diqqət mərkəzində olmuşdur. Bu il işçilərin yay istirahətləri füsunkar gözəlliyi ilə göz oxşayan Lerik rayonunun “RELAX” İstirahət Mərkəzində təşkil olunmuşdur. İyun ayından başlayaraq QSC-də çalışan işçilər növbə ilə şənbə və bazar günlərində öz istirahətlərini bu İstirahət Mərkəzində keçirirlər. İşçilərin istirahətlərinin mənalı və yüksək səviyyədə keçməsi üçün QSC-nin rəhbərliyi və Həmkarlar İttifaqı Komitəsi tərəfindən bütün zəruri tədbirlər görülmüşdür. İstirahət müddətində işçilər arasında futbol, nərd və digər idman yarışları keçirilir, maraqlı gəzintilər təşkil edilmişdir.
Bununla yanaşı, Həmkarlar İttifaqı Komitəsinin xətti ilə işçilərin ailəvi istirahətlərinin təşkil olunması istiqamətində də məqsədyönlü tədbirlər həyata keçirilmişdir. Yay istirahət mövsümündə 29 (102 nəfər ailə üzvü ilə birlikdə) nəfər işçiyə respublikamızın müxtəlif istirahət mərkəzlərində ailəvi dincəlmələri üçün yollayışlar verilmişdir. 2013-cü ilin yay istirahət mövsümünə başlandığı müddətdən indiyədək QSC-də çalışan 352 nəfərədək işçinin yay istirahəti "RELAX" İstirahət Mərkəzində yüksək səviyyədə təşkil edilmişdir. Avqust ayının sonunda QSC işçilərinin yay istirahətləri başa çatmışdır.
Növbəti illərdə də işçilərin yay istirahətinin səmərəli keçməsi üçün tədbirlər davam etdiriləcəkdir.
tarix : 10.09.2013
|