“Ekol Mühəndislik Xidmətləri” QSC-nin Tullantıların Emalı Departamentinin (TED)  əsas fəaliyyət sahələrindən biri də  ərsin parafininin  sudan və mexaniki qarışıqlardan təmizlənməsidir.  Bu məqsədlə 2007-ci ildə  QSC-nin O.Vəliyev 1  ünvanda yerləşən xidmət sahəsində  (Heydər Əliyev adına BNEZ-nun 9-cu sexinin ərazisi)  müasir  standartlara cavab verən, istehsal gücü bir dövr (48 saat) ərzində 17 ton olan yeni parafin təmizləmə sexi  inşa edilərək istifadəyə  verilmişdir.    Hazırda TED-nin 8-ci sahəsi kimi fəaliyyət göstərən  Parafin təmizləmə sexi fəaliyyəti  dövründə "Sifarişçi"  təşkilatlardan qəbul etdiyi 900 tondan çox  ərsin parafinini reqlamentə uyğun olaraq  təmizləmişdir.

     Əvvəlki illərdə olduğu kimi  2013-cü ilin 9 ayı ərzində də TED-nin   8-ci sahəsi  məhsuldar işləmiş, "AAS-EKOL" MMC- dən qəbul etdiyi  112 tona qədər parafini sudan və mexaniki qarışıqdan  təmizləyərək təyinatı üzrə təhvil vermişdir.

    TED-nin 8-ci sahəsinin fəaliyyətinin  fasiləsizliyinin təmin olunması və texnoloji proseslərin   beynəlxalq standartların tələbləri səviyyəsində qurulması da daimi diqqət mərkəzindədir. Bu məqsədlə vaxtaşırı olaraq sexdə  profilaktiki təmir, yenidənqurma  və abadlaşdırma işləri   həyata keçirilir.  Cari ilin payız-qış mövsümü ilə əlaqədar hazırda 8-ci sahədə   su, buxar və hava xətlərinin  izolyasiyası, qurğu və avadanlıqların, boru xətlərinin  təyinatına uyğun rənglənməsi, eləcə də profilaktiki təmir işləri  həyata keçirilir.

tarix : 29.10.2013