Noyabrın 18-də "Ekol Mühəndislik Xidmətləri" QSC-nin baş ofisində Yeni Azərbaycan Partiyasının 21 illiyi ilə əlaqədar tədbir keçirilmişdir. Tədbirdə YAP Nizami rayon təşkilatının sədri, Millət vəkili Sədaqət Vəliyeva, təşkilatın idarəetmə aparatının rəhbəri Ramil Vəlibəyov, QSC-nin rəhbərliyi və YAP "Ekol" ilk ərazi təşkilatının fəalları iştirak etmişlər.
Tədbirdə çıxış edənlər, QSC-nin baş direktoru Ramil Əliyev, YAP "Ekol" ilk ərazi təşkilatının sədri Fəxrəddin Quliyev, təşkilatın sədr müavini Rəşad İsmayılov, baş direktorun məsləhətçisi Kamil Akimov, Gənclər təşkilatının sədri Səbuhi Veysəlov və başqaları bildirmişlər ki, Yeni Azərbaycan Partiyası siyasi səhnəyə XX əsrin 90-cı illərin əvvəllərində ölkədə yaranmış mürəkkəb ictimai-siyasi şəraitdə gəlmişdir. Partiyanın təsis konfransı 21 noyabr 1992-ci ildə Naxçıvanda keçirilmiş və Heydər Əliyev YAP-nın sədri seçilmişdir. Müxalifət bir partiyası kimi meydana gələn Yeni Azərbaycan Partiyası qısa bir müddətdə geniş şöhrət qazanaraq cəmiyyətin bütün təbəqə və kateqoriyalarından olan sağlam qüvvələri öz ətrafında birləşdirə bilmiş, ümumxalq partiyası olmaq istiqamətində uğurlu addımlar atılmışdır. 1993-cü ildə YAP-nın sədri Heydər Əliyevin ölkə prezidenti seçilməsi ilə partiyanın həyatında yeni dövrün əsası qoyulmuş, partiyanın statusu yeni şəraitə uyğun olaraq dəyişmiş, iqtidar partiyasına çevrilərək ölkənin siyasi həyatında tutduğu mövqeyini möhkəmləndirmişdir.
Tədbirdə çıxış edən Sədaqət Vəliyeva qeyd etdi ki, Prezident İlham Əliyev cənablarının sözləri ilə desək ölkəmizin ictimai-siyasi həyatında həlledici rol oynayan Yeni Azərbaycan Partiyasının qərarları Azərbaycanın inkişafına böyük tövhələr vermişdir. Cənubi Qafqazın ən böyük partiyası olan və son 21 ildə ölkədə keçirilən bütün seçkilərdə böyük üstünlüklə qələbə qazanan YAP, bütün təbəqələri özündə birləşdirir və partiya üzvlərinin sayı artaraq 600 mini keçmişdir. Əsas ideoloji dayaqları müstəqillik, azərbaycançılıq, sosial inkişaf, siyasi və iqtisadi islahatlar olan YAP-nın mövcud olduğu dövrdə ölkəmizin sürətli inkişafına nail olunmuş, Azərbaycanın xarici siyasətində bir çox uğurlara imza atılmışdır.
Bütün bu proseslərdə böyük rolu olan YAP-nın mütəşəkkil fəaliyyəti və öz liderinə sədaqəti nəticəsində ölkəmiz bütün sahələrdə daha böyük naliyyətlər əldə etmişdir. Bunu son 10 ilin göstəriciləri də təsdiqləyir. Son illərdə Azərbaycan beynəlxalq aləmdə yüksək zirvələri fəth edib. Ölkəmiz BMT Təhlükəsizlik Şurasının üzvü olub. Bu gün YAP Azərbaycanın qlobal problemlərinin həllində mühüm rol oynayır. Ölkəmiz Avropanın enerji təhlükəsizliyinin həllində mühüm faktordur. Xarici siyasətdə qazanılan uğurlar, daxildə də uğurlu siyasətin aparılmasına, iqtisadi sahədə ölkənin parlaq gələcəyinin planlaşdırılmasına imkan vermişdir.
Bütün naliyyətlərimizin təməlində Heydər Əliyev siyasəti dayanır, dövlətimizin yürütdüyü siyasətin mərkəzində duran əsas qüvvə isə Azərbaycan vətəndaşıdır. Dövlətimizin siyasi sisteminin sütunu olan YAP ölkəmizdə siyasi islahatların aparılmasında da mühüm rol oynayır. Buna görə də YAP-nın siyasi səhnədə ciddi rəqibi yoxdur.
Daha sonra Sədaqət Vəliyeva YAP Nizami rayon təşkilatının ictimai-siyasi fəaliyyəti haqqında tədbir iştirakçılarına geniş məlumat vermiş, bu illər ərzində qazanılan uğurlardan və əldə olunan nailiyyətlərdən danışmışdır. O, çıxışını davam etdirərək "Ekol" ilk ərazi təşkilatının nümunəvi və fəal bir təşkilat olduğunu, bu təşkilatda siyasi cəhətdən yetkin fikirli gənclərin formalaşdığını xüsusilə vurğuladı.
Tədbirin sonunda YAP Nizami rayon təşkilatının sədri Sədaqət Vəliyeva "Ekol" ilk ərazi təşkilatını və bu təşkilatın bir sıra fəal üzvlərini Fəxri Fərmanla və mükafatla təltif etdi. "Ekol Mühəndislik Xidmətləri" QSC-nin baş direktoru Ramil Əliyev və YAP "Ekol" ilk ərazi təşkilatının sədri Fəxrəddin Quliyev təşkilata göstərilən bu diqqətə görə Sədaqət Vəliyevaya öz təşəkkürlərini bildirdilər.
Tədbirdə videoçarx vasitəsilə YAP-nın yubileylərindən və V-ci qurultaydan fraqmentlər nümayiş etdirilmiş və iştirakçılar tərəfindən böyük maraqla izlənilmişdir.