Azərbaycan Respublikası Ekologiya və Təbii Sərvətlər Nazirliyinin dəstəyi və “ITECA" şirkətinin təşkilatçılığı ilə “Bakı Ekspo Mərkəzi" ndə ətraf mühitin mühafizəsinə həsr olunmuş “Xəzər: Ətraf Mühit üçün Texnologiyalar” (CTE) 4-cü Beynəlxalq Ətraf Mühit Sərgisi noyabrın 20-də öz işinə başlamışdır.
Xəzəryanı və Qafqaz regionlarında keçirilən ən iri ekologiya və ətraf mühitin mühafizəsi sərgisi biznesin Azərbaycanda inkişafı üçün əlverişli vasitə olmaqla yanaşı yeni tərəfdaş axtarışı, bazarın təhlili və iştirakçılarla effektiv iş aparmaq üçün münbit şərait yaradır. Sərgi Azərbaycanın və xarici ölkələrin "təmiz" texnologiyalar bazarını təmsil edən aparıcı simalarını, habelə ekologiya, utilizasiya və təmizləmə sahəsində öz məhsul və xidmətlərini təklif edən şirkətləri, eləcə də elm xadimlərini və dövlət orqanlarının nümayəndələrini bir araya gətirmişdir.
Sərgidə, ARDNŞ-nin və xarici investor «Lancer Services S.A.» Şirkətinin təsisçiliyi ilə yaradılmış “Ekol Mühəndislik Xidmətləri” QSC də icra etdiyi ekoloji layihələri və istehsalata tətbiq etdiyi müasir texnika və texnologiyaları əks etdirən maraqlı stendi və eksponenti ilə iştirak edir. QSC-nin aktual ekoloji layihələrini əks etdirən stendi, xüsusilə İsveçin “Alfa-Laval” şirkətinin istehsalı olan, neftşlam emal edən modul dekantor qurğusunun maketi sərgi iştirakçıları tərəfindən böyük maraqla izlənilir.
Noyabrın 21-də isə Azərbaycan Respublikasının Ekologiya və Təbii Sərvətlər Naziri Hüseynqulu Bağırov sərgiyə baxış keçirmiş, digər iştirakçıların stendi ilə yanaşı “Ekol Mühəndislik Xidmətləri” QSC-nin stendi ilə də tanış olmuşdur. H. Bağırova ətraf mühitin mühafizəsi sahəsində QSC-nin həyata keçirdiyi ekoloji layihələr və yaşıllaşdırma tədbirləri haqqında qısa məlumat verilmişdir.
“Xəzər: Ətraf Mühit üçün Texnologiyalar” 4-cü Beynəlxalq Ətraf Mühit Sərgisi noyabrın 22-dək davam edəcəkdir.
tarix : 21.11.2013
|