"Ekol Mühəndislik Xidmətləri" QSC-nin baş direktoru Ramil Əliyev, baş direktorunun istehsalat üzrə müavini-Texniki direktor Məzahir Hüseynov, SƏTƏM üzrə müavini Rəşad İsmayılov, ARDNŞ-nin Ekoloji layihələrin İdarəedilməsi şöbəsinin rəisi Rövşən Fətullayev, QSC-nin əlaqədar departament və şöbə rəisləri, həmçinin "Black Gold LLC" şirkətinin direktorlar Şurasının üzvü Mohammed Abdulla Ahmed Saleh Al Hammadi, şirkətin maliyyə meneceri Mustafa Abdulla Abdelrahman və şirkətin Azərbaycan təmsilçiləri görüşdə iştirak etmişlər.
"Ekol Mühəndislik Xidmətləri" QSC-nin baş direktoru Ramil Əliyev qonaqları salamlayaraq onlara QSC haqqında qısa məlumat vermiş və sonra söz qonaqlara təqdim etmişdir.
Görüşdə çıxış edən "Black Gold LLC" şirkətinin direktorlar Şurasının üzvü Mohammed Abdulla Ahmed Saleh Al Hammadi əvvəlcə səmimi qəbula görə QSC rəhbərliyinə öz minnətdarlığını bildirmişdir. Sonra o, çıxışına davam edərək təmsil etdiyi şirkətin BƏƏ-də ekoloji yönümdə fəaliyyət göstərən, xüsusilə turşulu qudronların, lay sularının və neftlə çirklənmiş torpaqların təmizlənməsi ilə məşğul olan potensial imkanlı bir şirkət olduğunu və fəaliyyəti dövründə şirkətin bu sahədə bir sıra uğurlu layihələr həyata keçirdiyini bildirmişdir. Abdulla Ahmed görüşün keçirilməsinə diqqət çəkərək qeyd etmişdir ki, onlarda olan məlumata görə Azərbaycanda ətraf mühitin mühafizəsi, xüsusilə lay sularının, turşulu qudronun və neftlə çirklənmiş torpaqların təmizlənməsi sahəsində bir çox problemlər mövcuddur. "Ekol Mühəndislik Xidmətləri" QSC isə bu sahədə prioritet ekoloji layihələrin həyata keçirilməsində özünü təsdiq etmiş bir şirkətdir. Bu səbəbdən də QSC ilə əməkdaşlıq etmək niyyətindədirlər.
Abdulla Ahmed çıxışına davam edərək bildirmişdir ki, bu görüşün keçirilməsində əsas məqsəd "Black Gold LLC" şirkətinin Azərbaycandakı ekoloji layihələrin icrasına investisiya qoymaq, bu sahədə birgə Müəssisə yaratmaq və "Ekol Mühəndislik Xidmətləri" QSC ilə əməkdaşlıq etmək niyyətini bəyan etməkdir.
Sonra tərəflər arasında gələcək əməkdaşlıq əlaqələrinin mümkün variantları və digər ekoloji problemlərin həlli sahəsində birgə fəaliyyət istiqamətləri geniş müzakirə edilmiş və qərara alınmışdır ki, növbəti görüş daha geniş tərkibdə keçirilsin, əməkdaşlıq əlaqələrinin istiqamətləri və digər texniki məsələlər konkret təkliflərlə müzakirəyə çıxarılsın.