"Sifarişçi" məmnunluğunu qazanmaq və müqavilə öhdəliklərinə layiqincə əməl etmək 2013-cü ildə də QSC-nin Tullantıların Emalı Departamentinin (TED) fəaliyyətinin əsas istiqamətlərindən olmuşdur. Ötən il BNEZ-dan TED-nin 6-cı sahəsinin(Heydər Əliyev adına BNEZ-nun 9-cu sexinin ərazisi) mexaniki təmizləyici qurğularına daxil olan 10 milyon m3-ə qədər sənaye çirkab suları təmizlənmiş və texnoloji proseslər nəticəsində formalaşan 23 min 995 tona qədər neftşlam müasir texniki vasitələrlə emal edilərək zərərsizləşdirilmişdir. İl ərzində TED-nin 7-ci sahəsində isə (“Azərneftyağ” NEZ-nun 8-ci sexinin ərazisi) 11 milyon 550 min m3-ə qədər sənaye çirkab suları təmizlənmiş, 10 min 640 ton neftşlam emal olunaraq zərərsizləşdirilmişdir. Departamentin 8-ci sahəsində (Heydər Əliyev adına BNEZ-nun 9-cu sexinin ərazisi) fəaliyyət göstərən "Parafin təmizləmə sexində" isə "AAS-EKOL" MMC-dən daxil olan 143 tondan çox ərsin parafini sudan və mexaniki qarışıqlardan ayrılmışdır.
Ötən il ayrı-ayrı "Sifarişçi" təşkilatlarla bağlanmış müqavilələrə əsasən, ARDNŞ-nin "Xəzərdənizneftdonanma", Ekologiya İdarəsi, Qaz Emalı Zavodu, "Kompleks Qazma İşləri" Tresti, "Neftqaztikinti" Tresti, eləcə də FHN-nin Xəzər Hövzə Qəza-xilasetmə xidməti, AAS-ATE” MMC, “Suraxanı OİL Opereyşn Compani S.A ”, “AAS-EKOL” MMC, "İnter Qaz Servis" MMC və "Az Metanol KO" MMC-dən qəbul edilmiş 81 min 700 ton/ m3-dən çox müxtəlif növ tullantılar (şlam, neft şlam, yağlı su və torpaq, məişət-təsərrüfat çirkab, axıntı suları, neftli-yağlı və mexaniki qarışıqlı tullantılar və s.) texnoloji reqlamentə uyğun emal edilərək zərərsizləşdirilmişdir. Həmçinin, TED tərəfindən ARDŞ-nin Neft Kəmərləri İdarəsinin Neftin Nəqli Departamentində neft tərkibli və məişət-təsərrüfat axıntı sularını təmizləyən qurğulara xidmət göstərilmiş, 200 litrə qədər neftlə çirklənmiş axıntı və məişət- təsərrüfat çirkab suları təmizlənmişdir.
2013-cü ildə TED-nin icra etdiyi prioritet ekoloji layihələrdən biri də “Sabunçu rayonu ərazisində Bakı Olimpiya Stadionunun tikintisi ilə əlaqədar ayrılmış ərazidən fekal suların kənarlaşdırılması” layihəsi olmuşdur. İl ərzində ərazidən 413 min 407 m3-dək fekal suları kənarlaşdırılmışdır.
Ötən il TED Heydər Əliyev adına BNEZ-nun və "Azərneftyağ" NEZ-nun Bakı Ağ Şəhər layihəsi ərazisindəki köhnə istehsalat sahələrindən sənaye-çirkab, axıntı sularının nəqli layihəsini də müqavilə şərtlərinə və təqvim planına uyğun icra etmiş, bu ərazilərdən 172 min 406 m3-ə qədər sənaye-çirkab, axıntı suları təmizləyici qurğulara nəql edilmişdir
2013-ci ildə TED texnoloji proseslərin ətraf mühitə mənfi təsirinin minimuma endirilməsi, istehsalatın fasiləsizliyinin təmin edilməsi, göstərdiyi xidmətlərinin keyfiyyət və kəmiyyətinin artırılması istiqamətində də zəruri tədbirlər həyata keçirmişdir. TED-nin mexaniki təmizləyici qurğularında profilaktiki təmir işləri aparılmış, yeni FOX-15 separator qurğusunun istismara verilməsi üçün Türk mütəxəssisləri ilə birgə hazırlıq işləri görülmüşdür.
TED 2014-cü ildə də tullantıların idarə edilməsi sahəsində QSC-nin qarşısında duran vəzifələrin yüksək səviyyədə həyata keçirilməsi istiqamətində məqsədyönlü fəaliyyətini davam etdirəcəkdir.
tarix : 15.01.2014
|