Ümummilli lider Heydər Əliyevin 27 mart 1998-ci il «31 mart Azərbaycanlıların Soyqırımı haqqında» fərmanı ilə 31 mart- Azərbaycanlıların Soyqırımı Günü elan edilmişdir. Həmin ildən başlayaraq martın 31-də bütün Azərbaycan xalqı, o cümlədən xaricdə yaşayan soydaşlarımız soyqırımı qurbanlarının xatirəsini yad edir, ermənilərin vandalizm və işğalçı siyasətini pisləyirlər.
"Ekol Mühəndislik Xidmətləri" QSC-də də hər il bu tarixi faciə günü ilə əlaqədar tədbirlər keçirilir. Martın 31-də isə QSC-nin istehsalat sahələrində “31 mart-Azərbaycanlıların Soyqırımı Günü”nün 96-cı ildönümü ilə əlaqədar növbəti tədbirlər keçirilmişdir. Bununla yanaşı, QSC kollektivinin nümayəndələri YAP Nizami rayon təşkilatının Quba Kütləvi Məzarlığına təşkil etdiyi ziyarətdə də iştirak etmişlər. Tədbirlərdə çıxış edənlər qeyd etmişlər ki, iki əsr ərzində ermənilər tərəfindən azərbaycanlılara qarşı məqsədyönlü şəkildə həyata keçirilmiş etnik təmizləmə və soyqırımı siyasəti nəticəsində xalqımız ağır məhrumiyyətlərə və məşəqqətlərə məruz qalmışdır. Qeyri insani siyasət nəticəsində azərbaycanlılar min illər boyu yaşadıqları tarixi etnik torpaqlarından didərgin salınaraq kütləvi qətl və qırğınlara məruz qalmış, xalqımıza məxsus minlərlə tarixi mədəni abidələr və yaşayış məskənləri dağıdılaraq viran edilmişdir. Erməni daşnakları təkcə bu gün Ermənistan adlanan ərazidə deyil, eləcə də Bakı quberniyasında, Şamaxı, Quba və Göyçay şəhərlərində, Qarabağda, Zəngəzurda, Naxçıvanda da vaxtaşırı olaraq xalqımıza qarşı qırğınlar, talanlar, yanğınlar, terror və digər zorakılıq aktları həyata keçirmişlər. Çıxışlarda qeyd olunmuşdur ki, xalqımıza qarşı törədilən soyqırımından 96 il ötməsinə baxmayaraq, bu vəhşiliklər xalqın qan yaddaşında dərin iz buraxmışdır. Tarixin hələ tam açılmamış səhifələrindən biri olan bu soyqırımı hadisəsi xalqımıza qarşı dəfələrlə törədilmiş kütləvi qətl kimi qiymətləndirilməlidir. Gələcəkdə bu kimi halların baş verməməsi üçün biz gənc nəsli vətənpərvərlik və mübarizlik ruhunda tərbiyə etməliyik. Ulu öndərimiz Heydər Əliyevin sözləri ilə desək “Tarixi yaddaşsızlıq və unutqanlıq xalqımıza baha başa gələ bilər. Azərbaycanlılara qarşı zaman-zaman törədilən bu ağır cinayətləri unutmamaq, böyüyən nəsli bədxah qüvvələrin məkrli niyyətlərinə qarşı ayıq-sayıqlıq ruhunda tərbiyə etmək mühüm vəzifədir”. Çıxışlarda vurğulanmışdır ki, ötən əsrdə ermənilərin azərbaycanlılara qarşı törətdikləri soyqırımı və deportasiya siyasəti bu gün də özünü Dağlıq Qarabağda baş verən məlum hadisələrlə büruzə verir. Bu həm də onu göstərir ki, ermənilərin xalqımıza olan tarixi münasibəti dəyişməyib. Ancaq Azərbaycanın beynəlxalq aləmdə möhkəmlənən mövqeyi və real beynəlxalq vəziyyət ötən əsrdən tamamilə fərqli olduğuna görə yəqin ki, Ermənistan-Azərbaycan münaqişəsinin ədalətli həlli, erməni işğalçılarının torpaqlarımızdan çıxarılması, daşnak ideyalarının davamçılarının yerində oturdulması mümkün olacaqdır. Sonda tədbir iştirakçıları bütövlükdə ermənilərin vandalizm və işğalçı siyasətinə sonsuz qəzəb hissi ilə öz etirazlarını bildirmiş və soyqırımı qurbanlarının əziz xatirəsini bir dəqiqəlik sükutla yad etmişlər.
tarix : 31.03.2014
|