Mayın 30-da, “Ekol Mühəndislik Xidmətləri” QSC-nin baş ofisində Ekoloji Monitorinq Departamentinin rəisi Şahabiddin Albuşovun "Əsrin Ziyalıları" İctimai Birliyi tərəfindən "ilin ekoloqu" adına layiq görülməsi ilə əlaqədar təqdimat mərasimi keçirilmişdir. Mərasimdə QSC-nin rəhbərliyi və kollektivin nümayəndələri, eləcə də "Əsrin Ziyalıları" İctimai Birliyinin rəsmiləri iştirak etmişlər.
Tədbirdə çıxış edənlər, baş direktorun SƏTƏM üzrə müavini Rəşad İsmayılov, baş direktorun məsləhətçisi Kamil Akimov, Ekoloji Monitorinq Departamentinin şöbə rəisi Elxan Teymurov və başqaları mənalı həyat yolu keçmiş, öz fəaliyyətini əsasən respublikamızda ətraf mühitin mühafizəsi və ekoloji vəziyyətin yaxşılaşdırılması kimi şərəfli bir işə həsr etmiş Şahabiddin Albuşovun həyat və fəaliyyətindən danışmış, onun ömür yolunun bir çoxları, xüsusilə gənc nəsil üçün örnək olduğunu xüsusilə vurğulamışlar. Qeyd olunmuşdur ki, Ş. Albuşov ayrı-ayrı təşkilatlarda göstərdiyi çoxillik fəaliyyəti dövründə bir sıra ekoloji layihələrin uğurla həyata keçirilməsində, həmçinin ətraf mühitin mühafizəsi sahəsində mürəkkəb və aktual ekoloji problemlərin həll olunmasında yüksək nailiyyətlər əldə etmişdir. Eyni zamanda o bir sıra ekoloji layihələrin hazırlanmasının və həyata keçirilməsinin iştirakçısı olmuşdur ki, bu da ətraf mühitin mühafizəsində və ekoloji vəziyyətin yaxşılaşdırılmasında öz müsbət nəticələrini vermişdir. 2006-ci ildən əmək fəaliyyətini “Ekol Mühəndislik Xidmətləri” QSC-də davam etdirən Şahabiddin Albuşov hazırda yüksək peşəkarlıq və işgüzarlıq göstərməklə, Ekoloji Monitorinq Departamentinin rəisi vəzifəsində çalışaraq həyata keçirilən ekoloji layihələrdə yaxından iştirak edir. Tədbirdə çıxış edən "Əsrin Ziyalıları" İctimai Birliyinin rəhbəri Məleykə Göyçəli bildirmişdir ki, Şahabiddin Albuşovla bir ziyalı və tanınmış bir ekoloq kimi uzun müddətdir ki, əməkdaşlıq edirik. Onun respublikamızın ekoloji vəziyyətinin yaxşılaşdırılması və ətraf mühitin mühafizəsi sahəsində verdiyi töhfələri nəzərə alınaraq İctimai Birliyimiz Ş. Albuşovu "ilin ekoloqu" adına layiq görmüşdür. Məleykə Göyçəli "ilin ekoloqu" medalını və xüsusi diplomu Ş. Albuşova təqdim etdi . Rəşad İsmayılov qeyd etdi ki, təqdim olunan bu mükafat təkcə Ş. Albuşova deyil, eyni zamanda onun təmsil etdiyi "Ekol Mühəndislik Xidmətləri" QSC-nə və kollektivin bütün üzvünə göstərilən böyük etimaddır və buna görə "Əsrin Ziyalıları" İctimai Birliyinə, xüsusən onun rəhbərliyinə öz minnətdarlığımızı bildiririk. Sonda Ş. Albuşov mükafata və etimada görə "Əsrin Ziyalıları" İctimai Birliyinin rəhbərliyinə öz təşəkkürünü bildirdi. Tədbir iştirakçıları yüksək mükafat alması münasibətilə Ş. Albuşovu təbrik etdilər.
tarix : 30.05.2014
|