Bakıda XXI Beynəlxalq "Xəzər neft, qaz, neftayırma və neft kimya" sərgisi keçirilir. Xəzəryanı regionda neft və qaz sahəsində ən böyük tədbir olan bu sərgi iyunun 3-də “Bakı Ekspo” Mərkəzində öz işinə başlamışdır. Sərgi və konfransın açılış mərasimində Azərbaycan Respublikasının Prezidenti cənab İlham Əliyev, dövlət rəsmləri və Beynəlxalq Əməliyyat Şirkətlərinin rəhbərləri iştirak etmişlər. Konfransın açılışında ölkə başçısı İlham Əliyev geniş məruzə ilə çıxış etmişdir. O, qeyd etmişdir ki: - "bu ilki sərgi və konfransın xalqımızın ümummilli lideri Heydər Əliyev tərəfindən hazırlanıb müvəffəqiyyətlə həyata keçirilən yeni neft strategiyasının təməl daşı "Əsrin müqaviləsi" nin 20-ci ildönümünə təsadüf etməsi əlamətdar hadisə kimi onun əhəmiyyətini daha da artırır. İnanıram ki, açılışına toplaşdığımız bu sərgi və konfrans həm qlobal, həm regional səviyyələrdə əməkdaşlığın bundan sonra da dərinləşməsinə zəmin yaradacaq, dünyanın neft-qaz sahəsindəki proseslərə töhfəsini verməklə mühüm görüş yeri olduğunu bir daha sübuta yetirəcəkdir. Sərgi və konfransın işinə uğurlar, bütün iştirakçılara gələcək fəaliyyətlərində nailiyyətlər, ölkəmizə isə sülh və əmin-amanlıq arzulayıram".
Dünyanın müxtəlif ölkələrindən 400-dən artıq şirkətlərin qatıldığı XXI Beynəlxalq "Xəzər neft, qaz, neftayırma və neft kimya" sərgisinin əsas bölmələri neft-qaz yataqlarında hasilat, geofizika və geologiya, qaz və neft quyularının tikintisi, işlənməsi, platformalar və üzən qazma qurğuları, qaz çıxartma sənayesi üçün avadanlığın layihələndirilməsi, istehsalı və texniki qulluq, boru kəmərlərinin təhlükəsizlik sistemlərinin təminatı, neft və qaz emalı, neft-kimya məhsulları, neft və qaz saxlama sistemlərinin təmin edilməsi və s. ibarətdir. “Ekol Mühəndislik Xidmətləri” QSC də bu möhtəşəm sərgidə maraqlı stendi ilə iştirak edir. QSC-nin xidmət sahələrini və həyata keçirdiyi ekoloji layihələri əks etdirən stend, elektron məlumatlar və əyani materiallar sərgi iştirakçıları tərəfindən böyük maraqla izlənilir. Yüksək səviyyədə təşkil olunmuş, müxtəlif sahələrdə fəaliyyət göstərən şirkətlər, idarə və müəssisələr arasında tanışlıq və əməkdaşlıq münasibətləri üçün əlverişli şərait yaratmış XXI Beynəlxalq "Xəzər neft, qaz, neftayırma və neft kimya" sərgi və konfransı iyunun 6-dək davam edəcəkdir.
tarix : 03.06.2014
|